नेपाली हास्यव्यङ्ग्य अनलाइन पत्रिका

अज्ञात युवक

मेरो टाउको ?
तेरो टाउको !
तालु र आलुका लागि
फुरौला र उफ्रौलाका लागि
हिजो ठडिएकै हो
आज ठिङ्गिएकै छ
सायद भोलि माटोमा जोतिनेछ

मेरो नाक ?
हजुरको नाक !
श्रीमतीज्यूले काटिदेलिन्

छोरो महोदयले हिलो पोत्ला
आफन्तले च्वाट्टै पार्लान्
र बाँकी रहला नाम मात्र
त्यसैले त मच्चाएर नाटक यत्रो
चलाइरहेछौँ खुत्रुक्कै भएर तपाई, हाम्रो भुत्रो

मेरो आँखा ?
हजुरको आँखा !
अर्धदेखि पूर्ण नग्नसम्म
सुरादेखि सुन्दरीसम्म
चस्मादेखि
भुसुनासम्मको रजाइँ गर्ने थलो
त्यसैले यी जोर आँखा
केही राम्रो देख्नै हुन्न
लाजै नमानी हेरिदिन्छन्
र त सधैँसधैँ
मैले फुरौलाका स्वादमा टुटिल्किनुपर्छ ।

मेरो कान ?
महोदयको कान !
कोकिल वाणीदेखि
सुशील गालीसम्म
सुन्ने बानीमा सजिलै मच्चिन थालेको छ
पवित्र पार्दै मुन्टिरहेको छ
सुन्ने गुन्ने
सबैसबै शब्दहरूमा

मेरो मुख ?
महाशयको मुख !
घिच्ने पनि हर्सुनलाई
थिच्ने पनि भर्कुनलाई
आँ गर्दै हाजिरी ठोकिरहेछ
सित्तैमा पाए
अलकत्रामा चिनी फेटेर
स्वाद मानीमानी धोकिरहेछ

मेरो भुँडी ?
श्रीमान्को भुँडी !
घुसदेखि भुससम्म
ठोसदेखि खोससम्म
कोच्न तयार छ
र त घ्याम्पे भुँडी
मलाई, श्रीमान्लाई भारी बोकाएर ठुस्किरहेछ

मेरो हात ?
जीको हात !
सोहोर्न र फोर्न
सकेसम्म अझै गाँसेर लम्ब्याउन
कज्याउँदै छ तनमनभरि

मेरो खुट्टा ?
ख्वामित्को खुट्टा !
लरखराइरहेछ खोयाबिर्केसँगै
सोहोर्ने र फोर्ने थलातिर
ठग्न र मग्न हुने दोबाटातिर
घिच्याइरहेछ, थच्याइरहेछ
र त लडखडाइरहेछौँ
ख्वामित् र म गल्लीहरूमा

मेरो शरीर ?
ज्यूको शरीर !
दाब्रिएर मरन्च्याँसे म
लाभ्रिएर ठड्न्च्याँसे ज्यू
एउटा दौडको प्रतियोगी
पुरस्कारको घोचोमोचोमा
टुप्पी ठड्याउँदै
लुङ्गी खुस्क्याउँदै
गन्तव्य भेट्न हुत्तिरहेछौँ, भुत्तिरहेछौँ ।

०००
गोकर्णेश्वर  ३, सुन्ताखान,
काठमाडौँ
९८४१८५१०२०