नेपाली हास्यव्यङ्ग्य अनलाइन पत्रिका

दीनानाथ पोख्रेल

बाबा हुन् गरिमा विशाल दिलका सत्कर्म आभा दिने ।
बाबा हुन् भव ज्ञान दिव्य हितको खोली सुबाटो दिने ॥
चिन्ता, ताप, तनाव भाग्दछ सबै बाबा सधैँ साथ हुन् ।
बाबा दूर गए अझै पर भए सन्तापका खात छन् ॥०१॥

बाबाले दृढ भाव सिर्जन दिए सद्ज्ञान अग्ला पथ ।
आफ्नो जीवन मार्गमा सहज नै गुड्दै छ उम्दा रथ ॥
बाबा ब्रह्म उदात्त पार्न गुणका खोल्छन् कला यत्नले ।
बाँकी पूर्ण बनाउने प्रण गरे बाँचिन्छ निस्वार्थले ॥०२॥

मान्छेका मनभावना सहजले चिन्ने सुबाटो दिने ।
अज्ञानीपन चेतका असजिला पन्साउँदै लम्किने ॥
बाँच्ने योग्य कला सुमानव हुने सत्कर्म सङ्ला दिए ।
बाबाकै बलले अनेक द्विविधा बाधाहरू नासिए ॥०३॥

जेजे योग्य छ कर्म गर्न भवमा हुन् शक्ति आभा पिता ।
बाँड्छन् भाव निका अनन्त हितका आकाश चुम्ने निका॥
गर्नै पर्छ सुकर्म नित्य मनमा गाँस्छन् सुकर्मी कला ।
लागू तौलन योग्य मूर्त पथमा के खोल्छ जम्मै गला ॥०४॥

पर्छन् कष्ट जहाँ त्यहाँ नरम छन् पानी बनी पग्लने ।
दुख्दा सन्तति दुख्दछन् हरघडी आफू स्वयम् डढ्दछन् ।
चाहून् योग्य सुमार्ग सन्तति खुली पानी सरी बग्दछन् ।
पाऊन् सत्य र तथ्य मार्ग सहजै झुक्नै परे झुक्दछन् ०५॥

ढुङ्गा गल्दछ ठोक्न लाग घनले गल्दैन बाबामन ।
पग्लन्छन् सब धातु अग्नि बलले पग्लन्न बाबामन ॥
बग्छन् वस्तु अनेक छाल बलले बग्दैन बाबामन ।
बेलामाफिक कर्म गर्न युगको तल्लीन बाबामन ॥०६॥

भोलेनाथ पुकार गर्छ मन यो पीडा सबै शान्त हुन् ।
काला छन् दिन हाल बिग्रन गयो हाँसो, खुसी दूर छन् ॥
चिन्ता, ताप, तनाव टोक्छ दिल यो सन्त्रासका राश छन् ।
भाग्यो शान्त उदात्त भाव पर भो चिन्ता कडा साथ छन् ॥०७॥

बाबाका कृत ख्याल गर्दछ हियो उड्दैन हावासँग ।
एक्लै बग्दछ कष्ट अश्रु जल त्यो देख्दैन सिङ्गो जग ॥
थाल्यौँ उठ्न स्वयम् विचार बलमा बाबा बनाई मियो ।
उम्दा छन् जति मार्ग जीवनविषे बल्दै छ बाबा दियो ॥०८॥

०००
भक्तपुर
(पोखरेलको अप्रकाशित खण्डकाव्य ‘बा’ लाई फित्कौली डटकमले क्रमशः प्रविष्ट गर्ने छ ।)