नेपाली हास्यव्यङ्ग्य अनलाइन पत्रिका

अर्जुन पराजुली :

कमरेड सुनहरू !
तिमी पार्टीको पदमा बस्ने होइन
बैङ्कको लकरमा बस्ने हो !
तिमी सत्तापक्ष वा विपक्षको भेषमा बस्ने होइन
‘सुन पसल न्यूरोड’को सोकेसमा बस्ने हो ।

कमरेड सुनहरू !
सुनको काम नेता बन्ने होइन
नेकलेस बन्ने हो !
सुनको काम सत्तामा झुन्डिने होइन
घाँटीमा झुन्डिने हो !
सुनको काम पार्टीको गजुर बनेर अल्किने होइन
पशुपतिको जलहरि बनेर टल्किने हो !
सुनको काम-
सत्तापक्ष वा प्रतिपक्षमा लागेर सम्सदमा भाग लिने होइन
बेहुला पक्ष वा बेहुलीपक्षमा लागेर बिहेमा भाग लिने हो !
सुनको काम सांसद बनेर संसदको ढाड भाँच्ने होइन
पाउजु बनेर छमछमी रत्यौली नाच्ने हो ।

कमरेड सुनहरू !
सुनको काम
मार्क्सवादी लेनिनवादी वा माओवादी बन्ने होइन
असर्फीवादी बन्ने हो !

०००
शितलपाखा, कीर्तिपुर