नेपाली हास्यव्यङ्ग्य अनलाइन पत्रिका

अर्जुन पराजुली :

काठमाण्डू
बलियाको हो, बाङ्गाको हो
भोका नाङ्गाको हाेइन, अघाएका नाङ्गाको हो !

घर नहुनेको होइन
भारी बोक्नेको होइन !
डोको राख्ने ठाउँ भाडामा लिएर
तरकारी जोख्नेको होइन !
मात लागेर खोक्नेको हो काठमाडू
दम लागेर खोक्नेको होइन !

काठमाण्डू नेपालभाषीको होइन
नेपालीभाषीको होइन !
दास दासीको हो काठमाण्डू !
काठमाण्डू हाकुपटासीको होइन ।
होइन, हुँदो कुरो बोल्नेको होइन
नाङ्लो पसल खोल्नेको होइन !
सुनका घोगा पोल्नेको हो काठमाण्डू
मकैका घोगा पोल्नेको होइन !

दिल्ली, बेइजिङ, वासिङ्टन
कसको हो काठमाण्डू मलाई थाहा छैन !
मेरो साथी ! मलाई यति थाहा छ-

काठमाण्डू तिम्रो होइन
काठमाण्डू मेरो होइन !!

०००

कीर्तिपुर