नेपाली हास्यव्यङ्ग्य अनलाइन पत्रिका

नवीन अभिलाषी :

चिहानतिर सोझिएको त्यो अर्ध पैताला तिम्रो हो ?

आलो रगतको गन्ध फैलिरहेको दाप
तिम्रो कम्मरमा किन झुण्डिरहेछ हँ ?

हिजो मात्रै
ल्याण्ड-फिल साइडमा तिम्रो एउटा मुकुण्डो देखेको थिएँ ।
ढलभित्र बग्दै गरेको अर्को
र अर्को कस्टडीतिर…..

औशीको मध्यरातमा
पीपलमा आत्महत्या गरेको विचार पक्कै तिम्रो थियो ।
विचारको आत्महत्यापछि पनि
लासले जीवन बाँचेको नाटक कसरी गर्न जानेको …. आम्मै नी ।

तिम्रो घरको जगमुनी
भन्न सक्छौ कस-कस्का हारखोर छन् ?
तिम्रो हाँसोको गर्तमुनी सुसाइरहने
ति आँसुका लहर कस्का हुन् ?

के साँच्चै
चिहानतिर सोझिएको त्यो अर्ध पैताला तिम्रो हो ?

इतिहासको भित्री गातामा लेखिन्न
तिमीले वर्तमानमा बाँचेका द्विअर्थी जीवनका अभिनय

त्यसैले मैले आजैबाट
एउटा अर्को इतिहास लेख्नुपर्ने भो

के मैले पनि रगतले नै लेखौँ इतिहास ?

०००
बाँके, काेहलपुर