प्रमाेद सारंगकवि महिमा
सिंढीमा कवि, पिंढीमा कवि दायाँ कवि, बायाँ कवि ! यो देशका ढुङ्गा र मन्दिरमा जति देवी देवताहरूको वास छ त्यो भन्दा बढी भग्नावशेष गल्लीहरूमा उत्ति नै कविहरूको सास छ।
प्रमोद सारंग :
आज कवि गोष्ठीमा जानु पर्ने,
कविता सुनाउनु पर्ने
ताली जोड्ले बज्ने खालको
के विषयमा लेख्नु हो कविता ?
महोदय,
हजुर पनि कवि हो कि ?
म पनि एउटा कवि
कतै चिन्नुहुन्छ कि यो कविलाई ?
कसरी चिन्नुहोला खै
अचेल कविहरू नै
कविताको आँखालाई ठुङिरहेछन्;
कतै-गुटको कवि
कतै-फुटको कवि
कतै-मान खोज्ने कवि
कतै-धान खोज्ने कवि
उहिले उहिले
सुनिन्थ्यो नाम र काम
आदिकवि, महाकवि, युगकवि
आदरणीय कवि !
अचेल त
गोष्ठी धाउने कवि
खादा लाउने कवि
फोटो खिंचाउने कवि
खाम समाउने कवि
दाम चढाउने कवि
नाम जोडाउने कवि
चिया कवि, समोसाकवि, सुक्खा कवि !
प्यारप्यारे कवि, ट्वारट्वारे कवि
टोलटोलमा कवि
चोकचोकमा कवि
वल्लो घर कवि
पल्लो घर कवि !
झण्डेकवि, दासकवि,
टेकापचेरे कवि, मुग्लाने कवि
बुज्रुककवि, फतफते कवि
लहरेखोकी कवि, गनगने कवि
मपाईं कवि, धपाईँ कवि !
कतै भीरको कवि
कतै पीरको कवि
कतै शीरको कवि
कतै भाङ्रे कवि
कतै नङ्रे कवि
आज गोष्ठीमा जानु पर्ने
कविता सुनाउनु पर्ने …!
कतै शान्तिको फूल फुलाउन
जीवन कस्ने कवि
कतै कविताको नाममा
कर्कश धुनले त्यसैत्यसै चुलिएर
आफैँलाई विपनामा डस्ने कवि
नचाहिंदो होहल्लामा कवि
आपसी खिँचातानीमा कवि
सिंढीमा कवि, पिंढीमा कवि
दायाँ कवि, बायाँ कवि !
यो देशका ढुङ्गा र मन्दिरमा
जति देवी देवताहरूको वास छ
त्यो भन्दा बढी भग्नावशेष गल्लीहरूमा
उत्ति नै कविहरूको सास छ।
आज गोष्ठीमा जानु पर्ने
कविता सुनाउनु पर्ने
ताली जोड्ले बज्ने खालको
के विषयमा लेख्नु हो कविता ?
महोदय हजुर पनि कवि हो कि ?
०००
Subscribe
Login
0 Comments
Oldest
