नेपाली हास्यव्यङ्ग्य अनलाइन पत्रिका

अर्जुन पराजुली :

सम्सदलाई भेडाबाख्राको खोर बनाएको कसले ?
समानुपतिक सीट तीनदेखि दश करोडमा
बेचेर खाएको कसले ?

समानुपातिक साम्सद पद
गर्लफ्रेन्ड र श्रीमतीको पेवा बनाएको कसले ?
तीन दिन बल्दा नि बलिनसक्ने गरी
घरमा नोटको थुप्रो लाएको कसले ?

गर्दिन भन्देभन्दै भ्रष्टाचार गरेको, कसले ?!
अदालत अख्तियार
आफ्नै झोलेले भरेको कसले ?

हेलिकप्टरमा केक ओसारेर
आफ्नू जन्मदिन मनाएको कसले ?!

देशलाई थी ब्रदर्स एण्ड कम्पनी –
बनाएको कसले ??
भुटानी शरणार्थी काण्ड गरेको,
गर्न लाएको कसले ?!

भिजिट-भीसाको नाममा
जनता बेचेर खाएको कसले ?!

भ्रष्टाचारका फाइल खुल्न थालेपछि
सरकार ढालेको कसले ?!
बक्यौता उठाउन खोज्दा
कुलमान फालेको कसले ?!

घुसलाई दान भन्दै अर्बअर्ब खाने कला
निकालेको कसले ?!

एनसेल, गिरीबन्धु, यति. ओम्नी
काण्डेकाण्ड भेला गरेर देश विकासमा
नयाँनयाँ कदम चालेको कसले ??

आफ्ना धुपौरा बाहेक अरुलाई सिध्याउन
नयाँनयाँ फर्मुला निकालेको कसले ?
भ्रष्टाचारमा समृद्धि ल्याएर देशलाई
‘ग्रे लिष्टमा’ फालेको कसले ?!

आफ्नू दशैं मनाउन, जनताको सम्सदलाई
-गर्दनमा खुँडाले हानेर
दुईदुईचोटि ढालेको कसले ?

अनि-
यता निधारमा राष्ट्रियताको स्टीकर टाँसेर
उता ‘आई लभ यु’ भन्दै ‘होली-वाइन’ को बोतललाई
अँगालो हालेको कसले ?

०००