नेपाली हास्यव्यङ्ग्य अनलाइन पत्रिका

रामशरण न्यौपाने पाँचघरे :

झाँगिए बहारले उजार बाग बेसरी
नृत्य गर्दछन् जहाँ चरीबरी सयौँ थरी
छिन् प्रसन्न सङ्गिनी बगानमा डुलाउँदा
वृद्धमा खुसी फुलोस् वसन्तले भुलाउँदा॥१॥

छन् बधू र पुत्र नै स्वदेशमा रमाउने
पौरखी बनी पुँजी कमाउने जमाउने
नाति नातिनीसँगै बसेर मुस्कुराउँदा
वृद्धमा खुसी फुलोस् वसन्तले भुलाउँदा॥२॥

बागमा प्रसून छन् अनेक रूप रङ्गका
गाउँठाउँमा जता बहार छन् उमङ्गका
झाँङमा लुकी चरा प्रगाढ प्रीत लाउँदा
वृद्धमा खुसी फुलोस् वसन्तले भुलाउँदा॥३॥

छन् गुराँसका घना बगान हेर निर्मल
वृक्ष छन् हराभरा अनेक पोषका फल
अन्नपात खेतमा थरी थरी झुलाउँदा
वृद्धमा खुसी फुलोस् वसन्तले भुलाउँदा॥४॥

छैन गाँस बासको कपासको कतै कमी
छिन् धरा हराभरा मनुष्य बस्दछन् रमी
शैल वा हिमाल वा मधेससम्म धाउँदा
वृद्धमा खुसी फुलोस् वसन्तले भुलाउँदा॥५॥

०००
भक्तपुर