नेपाली हास्यव्यङ्ग्य अनलाइन पत्रिका

मुर्कट्टालाई टोपी
सुहाउँछ भने लगाओस्,
बाउबाजेभन्दा अघि
नाति जन्मिन्छन् भने जन्मियून् र,
हिडून् खुट्टालाई टाउकाले टेकेर ।

आखिर समय,
बाङ्गोटिङ्गो रेखा न हो,
यो कहिले र कुन युगमा
सीधा खिचिएको छ र ?
भोलि गुरुत्व
समय सापेक्ष हुनसक्छ अनि,
न्युटनको स्याउ
जमिनबाट खसेर
आकाशमा झर्न सक्छ ।

नाप्ने नै हो भने,
स्वर्गको उचाइमा
नर्कको गहिराइ हुन्छ,
त्यसैले–
दुःख रमाउँदै जावोस्
सुखको बिचल्ली होस्
होश ढलेर बेहोस होस्
केही गुनासो छैन किन कि,
हिरण्यको घरमा प्रल्हाद नजन्मेको हो र ?

आखिर,
जिन्दगीलाई उत्तर देखाउने
कम्पास सबैसँग छ ।

काठमाडौं