नेपाली हास्यव्यङ्ग्य अनलाइन पत्रिका

झिँगटीको छानामा
घुर्दैछ बुढो परेवा
पोथितिर हेर्दै
बितेको समयको नोस्टाल्जीया

गडगडाएर बग्दैछ तमोर
रगत मिसिएको पानी
र जलिरहेछ मिनीटाटा मालबाहक
आगोका लप्काहरूको राजमार्गमा,

टिभीको प्रत्यक्ष प्रसारण
नयाँ वर्षको बजेट
ध्यानसँग सुन्दै छ
भाडाको बुद्धिजीवी
गर्नु छ भोलि अपव्याख्या उसले
एनजीओले आयोजना गर्ने सेमिनारमा,

खिचडी पाकिरहेछ
नयाँ लङगरमा
र बास्नाले अभिमत
नया सपनाहरू नखरा साथ
खान्छन् अविश्वास भोजन
हाम्रै खप्परमा पस्केर,

यतिखेर,
म केही गर्न सक्दिन
केवल सम्झना गर्छु
प्रतिबद्ध हृदयले असल दिनहरूको ।

कलङ्की, काठमाडौँ