नेपाली हास्यव्यङ्ग्य अनलाइन पत्रिका

घटुवारे लाछी भए डुब्छ क्यारे जाहाज
नदी तर्ने यात्रीहरूको सुक्छ क्या रे आवाज

छिद्र परि भुल्को पानी भित्रै पसिसक्दा
गिज्जिएर नकच्चरा गर्दै पो छन् मसाज

आशा लाग्दो दृष्टि गर्दै यात्री हेर्दै गर्दा
भए आफैं नमक–हराम तिनलाइ के लाज ?

जहाज भित्रै बन्द थियो पुर्खाहरूको नासो
बुट्टा हाली कुँदिएको सड्छ क्या रे दराज

अलिअली गर्दै डुबी झ्वाम्म पाताल पुग्दा
थाहा होला जहाजको कस्तो हुन्छ स्वराज

आफू डुब्ने पिर भन्दा चिन्ता भयो ठुलो
कोही आइ आँगनमा खेल्ने हुन् कि कवाज

जुर्मुराई यात्री आफैं टाल्न सकुन् दुलो
माता ‘दुर्गा’ सिर्जिदेउन यात्रीहरूको औकात ।

२०७१ कात्तिक
काठमाडौं