नेपाली हास्यव्यङ्ग्य अनलाइन पत्रिका

लोकलाई पूरा भैसक्यो अब ज्ञान
जनमतको बढ्तै भो अपमान
नेतागणको झन बढ्दो बेइमान
म्याद थपरेर छानिँदा हनुमान ।

जित्ने भका लुब्ध कि थर्कमान ?
हार्नेको पो झन ठूलो अभिमान
अर्गेल्याइँको टाँगेर बडो तान
बनेको छ कुन देशको संविधान ?

दलदलमा चर्कंदो छ तानातान
संयोग हैन गरेकै जानाजान
ओठमा भने सबैको ‘संविधान’
भित्र भने चलखेल र व्यवधान ।

हनुमानले लेख्या रे रामायण
बाल्मीकिको छ अब केको काम ?
मनमा सत्ता, भत्ता र गन्ती धन
बाहिरबाहिर देश, जनता, पहिचान ।

पूरापूर विचारे दिई ध्यान
सोझासाझा सबैलाई भइराछ पूरै ज्ञान
सबले हुनै पर्ने भो सावधान
ठालूहरू चाहन्नन् संविधान ।