नेपाली हास्यव्यङ्ग्य अनलाइन पत्रिका

रगत बगायौँ पसिना बगायौँ हामीले के पायौँ ?
बाँझो फोर्यौं खेती लगायौँ हामीले के पायौँ ?

अधकल्चा नाइकेहरूमा भागको निम्ति सधैँ झगडा
क्रान्तिको लागि पुरै सघायौँ हामीले के पायौँ ?

मान्छेहरू भोकै थिए बाँच्ने आशा कतै थिएन
ढुङ्गा पकायौँ फलाम पकायौँ हामीले के पायौँ ?

अहिले त झन् धेरै राजा गन्नै सकिन्न कतिकति
एउटा थियो त्यसलाई भगायौँ हामीले के पायौँ ?

सहिदहरू विलाप गर्छन् ‘हामी मर्नु बेकार भएछ’
देशको लागि जनता जगायौँ हामीले के पायौँ ?
२०७१ मङ्सिर ६
हेटौडा, मकवानपुर