बासु शर्माएउटा संविधान पाउँ न हजुर
कति हेर्नु बाँदरको नाच मात्रै,
कुस्ती हुँदैछ अरे हेर्न जाउँ न हजुर
त्यतैतिर फेरि जुँगाको लडाईं,
हामी पनि जुँगामा ताउ लाउँ न हजुर ।
ईमान, आचरण, निष्ठा र सिद्धान्त
ती सवै शब्दकोशका अलङ्कार भए
मै हुँ सर्वज्ञ, अरु सव मूर्ख अज्ञानी,
यस्तै धाक र धक्कु लाउँ न हजुर ।
शरम पचेर मान्छेको छि–छि–छि–
शरमलाई नै लौ न लौ शरम भो
बेशरमहरूको यो भिडमा कतै
शरमवाला छन् कि पत्ता लाउँ न हजुर ।
जनविश्वासको मत लिएका नेता
विश्वासलाई नै कुल्ची उफ्रिएका किन ?
अति भो अब त खेलबाड पनि
एउटा संविधान पाउँ न हजुर ।
हाल– बेलायत
