नेपाली हास्यव्यङ्ग्य अनलाइन पत्रिका

साउने भेलले उधार्ने गढतिरको चिहानमा
बारम्बार भेटिन्छन् ईन्कलाबवाला रातो डायरी
जाउ सिसिफस हो, उधिनिहेर समाधि
त्यहीँ लेखिएका छन् संविधानका धारा—उपधारा
सातसाले चिहानमा भेटिने चारतारे झन्डा हेर त–
त्यहीँ छन् जनतन्त्रका परिभाषा,
क्याप्टेन यज्ञबहादुरहरूको चिहानका कङ्कालमा
खोजिहेर लोकतन्त्रको अनुहार
त्यहीँ भेट्नेछौ तिम्रा बहुमत र अल्पमतका आधार
छिन्ताङ—सुखानी, पिस्कर र टिम्मुरबोटेको माटोमा खोज
पञ्चायती सङ्गीनले घोची बगेका रगतले लेखिएका दस्तावेजहरू
दोरम्बा, बेथान, तीनचुली र थबाङ पुगिहेर
अझै पाउनेछौ समाजवादको जग हाल्ने ढुङगो
कङ्काल कायाको पिठ्युँमा
खाली आन्द्रोको बरियोले थामेको भारी हेर,
दार्चुलाको डाँडोबाट पर ः
कालापार हिँडिरहेकाहरूको ताँती हेर,
विस्तारवादी बुटले थिल्थिलिएकाहरू
सीमास्तम्भ अँगाल्दै बसेको हेर ः
त्यहीँ भेट्नेछौ सहमतिको मिलनबिन्दू
भाषा नजान्दा नागरिकताको खोस्टो नपाउनेहरू,
नुन खेप्न जाँदा रारामा खस्नेहरू,
मालिकको हातबाट नथुनी तोडाउनेहरू
सवैको अनुहारमा हेर एकपटक
त्यहीँ भेट्नेछौ संसारको उत्कृष्ट संविधान ।
गोरखा