नेपाली हास्यव्यङ्ग्य अनलाइन पत्रिका

याद छ कमरेड ?
तपाईं बारम्बार भन्नुहुन्थ्यो
‘ममा धेरै दूरदर्शिता छ,
मौका पाए सिङ्गो जगतलाई देखाइदिन्छु’
कमरेड !
तपाईं फुस्फुसाउँदै भन्नुहुन्थ्यो
‘नेपाली जनता स्वाँठ हुन्,
नेपाली जनता लम्पट हुन्’
मानें कमरेड तपाईंलाई
तपाईं साँच्चै दूरदर्शी हुनुहुँदोरैछ
आखिर सिङ्गो जगतलाई देखाई छाड्नुभो
तपाईंजस्ता धुरन्धर
महापुरुषलाई चिन्न नसक्ने
भ्रष्टाचार र अपराधका
मतियार बन्न नसक्ने
नेपाली जनता स्वाँठ नै रैछन्
तपाईंको नजरमा गरिखाने
हामी सोझा नेपाली
लम्पट नै रहेछौं
धरोधर्म कमरेड !
अझै पनि तपाईंको
पहिचान गर्न नसक्ने
हामी सोझा नेपाली
लम्पट नै रहेछौं ।
जोरपाटी, काठमाडौं