नेपाली हास्यव्यङ्ग्य अनलाइन पत्रिका

जो तल्लो घर धाउँदैन,
जुम्ल्याहा हात लाउँदैन
ज्यान धनुष्टङ्कार बनाउँदैन
उसमा माननीय र सम्माननीयको योग्यता छैन ।
जो पश्चिमतिर धाउँदैन,
घरभित्रको पोल सुनाउँदैन
उसले डलर पाउँदैन
बुझ्नुहोस्, रक्षक हुने योग्यता छैन ।
जो कर छल्दैन, मिसावट गर्दैन
धुत्न पाऊँ भनी जुलुस निकाल्दैन
ऊ शुद्ध व्यापारी नै होइन ।
जसले क्याम्पस फोड्न जान्दैन,
गुरुलाई ढल्ने गरी हान्दैन
खुँडा खुकरी बोकी शिक्षालय जान मान्दैन
प्रेमीरप्रेमिका खोसिँदा पुस्तकालय पोल्नु कर्तव्य ठान्दैन
उसमा शिष्य हुने कुनै लक्षण नै छैन ।
जो काम चोर्न जान्दैन,
टेबलमाथि र मुनिबाट तान्दैन
चारतारे र हँसियाहतौडे दरबार धाउँदैन
ग्रीनकार्ड र पीआर छैन
पाऊँ भनी निवेदन पनि हाल्दैन
विदेशी संस्थासंस्था धाउँदैन
ऊ राष्ट्रसेवक हुने छनक नै छैन ।
चर्का कुरा नगरी जो बस्दैन,
दिउँसो बानेश्वर र खुल्लामञ्च
राति लैनचोर पस्दैन
ऊ क्रान्तिकारी नै होइन ।
अरु बेला गाँड कोराकोर गरिरहने
अनुकुलतामा सत्ताको घाँसे मैदानमा चरिरहने
सत्ता चटपछि अधिकारका बात मारिरहने
क्षेत्रीयता र बिखन्डनताका अण्डा पारिरहने
पदीय सौदाबाजीमा आफूलाई ढालिरहने
यसो गर्न जो जान्दैन, जाने पनि मान्दैन
ऊ क्षेत्रीय नेता नै होइन ।
काठमाडौं