आउनुहोस् बन्द सफल पारौँ !

सबैले हात हातमा भाटा
तयार पारौँ
बाइकमा आउनेहरूलाई
बाइकबाट झारौँ
अलिअलि लछारौँ
अलिअलि पछारौँ
गर्दन समातेर लघारौँ
भाटाले बाइक फुटाइदिउँ र
बाइकवालालाई पनि बजारौँ
यहाँ जनजातीले अधिकार पाएकै छैन
उसले अस्पताल जान पाउँछ?
यहाँ भनेजस्तो राज्य पाएकै छैन
ऊ बाइक चढेर जागिरमा जान पाउँछ?
यस्ता प्रतिक्रान्तिकारीको
कान बेस्सरी बटारौँ
आऔँ बन्द सफल पारौँ !
पेट्रोल तयार पारौँ
सलाई ठिक्क पारौँ
ट्याक्सी आयो भने रोकिदिउँ
ट्याक्सीवालालाई टाउको फुट्नेगरि ठोकिदिउँ
ट्याक्सीमा विदेश हिँडेको युवा हुनसक्छ
छटपटाइरहेकि गर्भवती हुनसक्छ
सबैलाई झपारौँ
ट्याक्सीबाट उतारौँ
उसले आफ्नै जातको मात्र जनसंख्या बढाउन
बच्चा पाउन पाउँछे ?
विदेशको गुलामी गरेर कसैले
पैसा कमाउन पाउँछ ?
यस्ता सामन्ती पुँजीबादिलाई बेस्सरी हपारौँ
आगो लगाएर ट्याक्सी ह्वारह्वार्ती बालौँ
र बन्द सफल पारौँ !
आऔँ
स्कुल, कलेज,
कलकाराखाना
बजार, सडक र देश
सबै ठप्प पारौँ
आखिर खोलेर के नै हुन्छ र !
जब बन्द छ सबैको मानसिकता
ठप्प छ चेतना अनि
हराइसकेको छ मानवता
बिदा मनाएर टन्न खाऔँ
अनि दिनभरि सुतेर डकारौँ
यसरी सबैले बन्द सफल पारौँ !