नेपाली हास्यव्यङ्ग्य अनलाइन पत्रिका

बन्ला देश भनेर आहुति दिने योद्धा बने पज्जल ।
टुक्रा गर्न कहाँ थियो र सपना मान्छे थिए अव्वल ।।
तिन्कै नाम भजी यहाँ शहिदका गर्दा भए मर्दन ।
सिंगो राष्ट्र त चाहना छ जनमा दिन्छन् यहाँ दर्जन ।।१।।

देखिन्छन् अतिशक्त व्यर्थ झगडा ढाडे विराला सरी ।
खोज्छन् देश विगार्न मात्र कसरी नेता अगाडी परी ।।
जालो धर्म र प्रान्तको शुरुगरे जो माग फिक्का थिए ।
हाम्रो माग विकास केवल यहाँ सम्पूर्ण ढिक्का भए ।।२।।

हाम्रो देश विकासमा लगभनी भन्छन् यहाँका जन ।
वैधानिक् पथमा हिँडाउन पनी माग्छन् जहाँ कानुन ।।
यस्ता छन् विचरा पुरै जनता लाद्छन् अरे शासक ।
खाना माग्दछ प्रान्त पाउँछ हरे नेता रहे नासक ।।३।।

खाए देश सबै मिलेर यसरी भन्छन् यहाँ सज्जन ।
राम्रो काम गरे भनेर यिनले भन्दैन यौटा तक ।।
यस्ता रीत गरेर बन्छ कसरी नेपाल सभ्रान्त खै ।
नेपाली कन अन्यका मुलुकले हेर्ला कसोरी ठिकै ।।४।।

कैले सुन्छु भयो अरे सहमती यो देश टुक्रा हुने ।
फेरी सुन्छु सबै मिलेर चिरियो टुक्रा छिमेकी छुने ।।
गल्तीरैछ हिजो र आज सचिने देखिन्छ है लक्षण ।
भन्दै अन्य गरिन्छ रे सहमती लाजै नमानी कन ।।५।।

आठै वर्ष वितेछ सम्झि रहँदा यो राज्य बन्ने कथा ।
भोली मिल्छ सबैकुरा भनि गरे झुट्टा कुरा सर्वथा ।।
वित्यो काल यहाँ पुरा शुभ घडी आएन कैल्यै पनि ।
मान्छे पर्खिरहे नयाँ दिनहरु चिप्ले ती जैल्यै पनि ।।६।।

एकै राष्ट्र भएर के दुख हुने वाँडेर के हुन्छ खै ।
खाली रीस बढेर जान्छ झगडा भैदिन्छरे प्रान्तमै ।।
आएमात्र विधान नयाँ किसिमको नेपाल टुक्रन्छकि ।
भन्ने त्रास लिएर यहाँ डरले बस्छन् गरी थक्थकि ।।७।।

वाँड्ने मन हुन्छ यो मुलुकको सोचेर टुक्रा गर ।
खोजी विज्ञहरु खुशी जनहरु मानेर तिन्को भर ।।
आफैगर्छु भनेर उठे यि जनता आगोबनी बल्दछ ।
कस्तो भो अव राजनीति घरका देखेर नै जल्दछ ।।८।।

छाडी देउ विधानका हरफमा तिम्रा सबै गन्थन ।
नेताभै वस देशभित्र नहिँता चल्दैछ आन्दोलन ।।
राम्रो दिन्छ नयाँ सुझाव जनता ल्याएर लेख्ने गर ।
बन्यौ खास दिएर भोट तिनले नेता भयौ भर्खर ।।९।।

पार्टी शक्ति अपार ठान्छ जसले नेता हुँदै होइन ।
ठूलो शक्ति तिनै महान जनता भन्ने विचारीकन।।
राम्रोलेख विधानमहाँ नविनता सम्मान पाईन्छ रे ।
राम्रा भाव समेटिने गरि बने नेपाल बन्ने छ रे ।।१०।।