नेपाली हास्यव्यङ्ग्य अनलाइन पत्रिका

सुतूँ कि नसुतूँ राति बन्द भोलि अरे कसो
समाचार सुनी बुझ्न रात पर्खूँ अझै कसो ।
सभासद् नै बन्द गर्न लागे रे पनि सुन्दछु
बन्दको मारमा पर्दा भोलि भोको म बन्दछु ।

साहूले कामका निम्ति बल्ल बल्ल भने तर
भोलि नै बन्द सुन्दै छु गर्नु खै भोलि आखिर ।
अस्तिको बन्दले गर्दा छाक टार्नै सकिन्न झन्
दुःखीको जीवनी बुझ्ने ब्रह्म नेता अदृश्य छन् ।

गरेर खान पाइन्न मरेर दाम मिल्दछ
भोलिको बन्द रे भन्छन् कसरी काम मिल्दछ !
भोकले म मरूँ यद्वा लडेर काममा जुटूँ
अन्ततः म मरिहाल्छु बन्द मृत्यु जसै लुटूँ ।।
काठमाडौं