नेपाली हास्यव्यङ्ग्य अनलाइन पत्रिका

ढल्यो आवास अर्कैको, ढल्नुको मर्म के थाहा ?
गलेकै छैन जो आफू गल्नुको मर्म के थाहा ?

सुखी निश्चिन्त मान्छेले कहाँ संवेदना बुझ्ने !
लुकाई अश्रु आँखाको छल्नुको मर्म के थाहा ?

विदेशी स्वादको खाना, कि ता कक्टेलकै मस्ती
क्षुधाले पेटमा आगो बल्नुको मर्म के थाहा ?

बनेका योजना व्यर्थै, पालको बासमा रोजै
चिसो यो रात काँपेरै टल्नुको मर्म के थाहा ?

कसैले शोकको भाषा बुझेनन्, बुझ्न चाहेनन्
चिसोले, भोकले मर्दै जल्नुको मर्म के थाहा ?

सिधासादाहरूलाई झुकेरै तुच्छ नेताले–
विदेशी ’देव’का पाउ मल्नुको मर्म के थाहा ?

दाङ