नेपाली हास्यव्यङ्ग्य अनलाइन पत्रिका

भन्छन् दोस्रो जलमय धरा विश्वमा देश हाम्रो
औँसीको झैँ तिमिर छ सधैँ लाग्छ धेरै नराम्रो ।
सुत्दा उठ्दा घरतिर हुँदा भेट नै हुन्न कत्ति
आयो केही धिपधिप गर्यो गैगयो फेरि बत्ती ।।

हावाबाटै विपुल बिजुली बाल्छ सर्वोच्च मन्त्री
सुन्दा काँप्छन् गफ अति ठुला उम्लिई शान्त तन्त्री ।
‘हावा’ लाग्छन् कतिपय कुरा लाग्छ ठट्टा गरेझैँ
देख्ता यस्तो असहज प्रथा लाग्छ ज्यूँदै मरेझैँ ।।

जोगी आए फरक तर ती मात्र कानै चिरेका
मागे, भागे तर पनि सधैकक देशवासी पिरेका ।
मर्दै गर्दा गरिब जनता भ्रष्टले गन्छ नोट
दिन्छन् नेता हरतरहले भोट मागेर चोट ।।

आऊ चाँडै नबन बिजुली चञ्चल त्रास बढ्ला
नेताको झैँ सकल जनतामा अविश्वास बढ्ला ।
वाचा बिर्सीकन समयको चट्ट चाँडो नजाऊ
आए केही पल बस यता या त कैले नआऊ ।।

सुर्खेत