नेपाली हास्यव्यङ्ग्य अनलाइन पत्रिका

१. उपलब्धि
हिजोको त्याग आज फोसा भएको छ
कामचोर प्रवृत्ति नै भरोसा भएको छ
विश्वासको लहरामा मेरो प्रजातन्त्र–
दाना विनाको कोसा भएको छ ।

२. कला
पुर्खाहरू लडे अँध्यारो गयो उज्यालो आयो,
बाउहरू विचारमा चिरा पार्दै गए शक्ति बरालियो,
छोराहरू लुट र फुटमै मस्त छन् चारैतिर–
हाम्रो कला ‘नपाउनेले केरा पायो बोक्रैसित खायो’ भैदियो ।

३. उद्देश्य
विश्वासको फोटो खिचेको छु फ्रेममा राख्नुपर्ला,
दर्शन, ज्ञान र विज्ञानका कुरा ब्रेनमा साँच्नुपर्ला,
महङ्गीले निमन्त्रणा–पत्र पठाइसकेको छ,
अब त डिजेल र मट्टितेलसँगै प्रेम गर्नुपर्ला ।

४. याद
भान्साको लसुन फोस्रियो
भँडारको आलु चाउरियो
गन्गने स्टोभ झर्कोफर्को गर्छ
एकान्तमा प्रियसीको याद बौरियो ।

मन्थली, रामेछाप