नेपाली हास्यव्यङ्ग्य अनलाइन पत्रिका

तिमीलाई बियाँ र चामल उस्तैउस्तै भयो
तिमीलाई जून र बादल उस्तैउस्तै भयो ।

ठिक र बेठिक नजानेपछि म के भनुँ र !
तिमीलाई हिलो र गाजल उस्तैउस्तै भयो ।

बजाऊ बेस्करी यो सहर पुरै थर्किने गरी
तिमीलाई जस्ता र मादल उस्तैउस्तै भयो ।

जङ्गलमा त हरेक चिज असरल्ल हुन्छन्
तिमीलाई गिट्ठो र काफल उस्तैउस्तै भयो ।

आज थैथै र भोलि कतै कन्तबिजोग नहोस्
तिमीलाई समतल र खाडल उस्तैउस्तै भयो ।

हेटौंडा