नेपाली हास्यव्यङ्ग्य अनलाइन पत्रिका

आइमाई !
अरे ओ आइमाई !!
तेरो सर्वोच्चताले थामेको यो सृष्टि {{read_more}}
म देख्न सक्छु तर हेर्नदिन्न 
आँखा बोकेर पनि, कानुनलेझैं 
पट्टी बाँधेर अन्धो बाँचेको
यो नपुङ्सक समाजलाई ।

सयौं जन्ती र आफन्त डाकेर
सातफेरो अग्नि साक्षी राखेर
ऊ लुरुक्क आएकी हो
मैले छाती ठोकेर ल्याएको हो
त्यसैले आई अब्जेक्ट !
आउने र ल्याउनेबिच
हिस्सा बराबरीको हुनुहुन्न ।

जान्दछु, नोट चपाएर मिल्दैन पेट भर्न
नभए नोट त अझ, मिल्दैन केही चपाउँन
सधैं, म कमाउँछु उसले खाने
ऊ पकाउँछे मैले खाने
त्यसैले आई अब्जेक्ट !
कमाउँने र पकाउँनेबिच
सिक्का बराबरीको हुनुहुन्न ।

गर्जने, राजा ठहरिएको सिंहले हो
म्याउँ त गाँस ढुक्ने बिरालोको
म आकाश हुँ गर्जन थाम्ने
ऊ शून्य पाताल, आवाज नपुग्ने
त्यसैले आई अब्जेक्ट ! 
आकाश र पाताल बिचको
समागम बराबरीको हुनुहुन्न ।

शक्ति, एउटा सार्व्तिक परिकल्पना
स्वभिमान, खामबन्दी भएको सानो कथन 
मेरो, र त, पुरुषत्व जन्मसिद्ध 
उसको तर, दासत्व जन्मसिद्ध 
त्यसैले आई अब्जेक्ट ! 
दासत्व र पुरुषत्वबिच
बहस बराबरीको हुनुहुन्न ।

कालीको भक्त हुँ म, रक्षा गर्छिन्
महालक्ष्मीको भक्त हुँः दौलत दिन्छिन्
लिनु परेवापत पो गरेकोछु भक्ति 
आइमाईबाट लिने सेवा त निशुल्क छ यहाँ
त्यसैले आई अब्जेक्ट !
देवी र आइमाइबिच
नाता बराबरीको हुनुहुन्न ।

त्यसैले
अरे ओ आइमाई !!
तेरो सर्वोच्चताले थामेको यो सृष्टि
म देख्न सक्छु तर हेर्नदिन्न 
आँखा बोकेर पनि कानुनलेझैं
पट्टी बाँधेर अन्धो बाँचेको
यो नपुङ्सक समाजलाई ।