काशीनाथ मिश्रितहान साथी
अरु गोबर गणेश गई के गर्छन् र सरकारमा ढाँटी छली जसरी नि मलाई नै छान साथी !
काशीनाथ मिश्रित :
मेरो चुनाव चिह्नमा नै तिम्ले छाप हान साथी !
रुपैयाँको बिटो पाउला यति मन्त्र जान साथी !!
मैले जितेँ भने नेपाल बनाइदिन्छु सिङ्गापुर
घरै बसी मिठो मिठो पाउला नि खान साथी !
जागिरसागिर लगाइदिउँला तिम्रा साला भेनालाई
सकेसम्म यतैतिर जम्मै भोट तान साथी !
लाटा सोझा जनताको बुद्धि भुट्न सक्यौ भने
मन्त्री हुनासाथ तिम्लाई चढाइदिउँला यान साथी !
तिम्रै मान्छे मेरो पि ए बनेपछि भन्सारमा-
रोक्ने छैन कसैले नि सुन ल्याउन लान साथी !
सिद्धान्तको सिल्ली कुरा सिद्धिइहाल्यो गर्न हुन्न
सरकारमा जानै पर्छ यति कुरा मान साथी !
अरु गोबर गणेश गई के गर्छन् र सरकारमा
ढाँटी छली जसरी नि मलाई नै छान साथी !
सर्वहारा गरीबको चिन्ता मात्र कति गर्छौ ?
राजनीति गरेपछि बढ्नै पर्छ सान साथी !!
०००
२०८० माघ ११ गते
गुल्मी
Subscribe
Login
0 Comments
Oldest
