नेपाली हास्यव्यङ्ग्य अनलाइन पत्रिका

पदम भण्डारी :

मन्त्री पद सकियो सभा-सद् सकियो
उसको कुर्सी सकियो अनि, पद सकियो ।१।

पद थियो ईज्जत थियो, मानसम्मान थियो
चालै नपाई निमेषमै, हत्पत सकियो ।२।

मुलुक रणमैदान बन्यो, क्षणभरमै जल्यो
सिंहदरवार सकियो अदा-लत सकियो ।३।

पेट्रोल छर्के आगो लाग्यो, पैसा सुन डढ्यो
सम्पत्तिको भण्डार अनि, रसद् सकियो ।४।

अब उसको जुत्ता मोजा, लगाई दिने कसले
उसको आवाज सकियो अनि, कद सकियो ।५।

उसको उखान टुक्का भन्ने, ल्याकत सकियो
सकियो अब उसको म्याद, हद सकियो ।६।

सिंहासनमा बिराज थिए, छोटे राजाहरु
खुसी थिए त्यै खुसीको, गदगद् सकियो ।७।

बहुमतको दम्भ पालि, जे गरे नि हुन्छ
भन्ठानेका ठालुहरुको, हर्कत सकियो ।८।

आफ्नो शक्ति अनि धनको, मद् लागेको थियो
अब उसको अहंकारको, मद् सकियो ।९।

शहिद हुने शहिद भए, घाइते हुने घाइते
नहोस तिनको माग अभी-मत सकियो ।१०।

०००
चितवन