नेपाली हास्यव्यङ्ग्य अनलाइन पत्रिका

१.
सोचेँ हिँड्दा हिँड्दै ठेस लागेर लड्नु भएछ हजुर
कसरी आफैँले खनेको खाडलमा गड्नु भएछ हजुर ?
हेर्दाहेर्दै घर आँगन सर्वत्र किन फोहोर पार्नु भयो
गिद्धहरू समीपमै देखिए सायद सड्नु भएछ हजुर ।

२.
दुईचार शहीदहरूका सालिक बनेका छन्
भगुवाहरू जनताका मालिक बनेका छन्
देशभक्ति त हात्तीको देखाउने दाँत भयो
झूटको खेती गर्ने सार्वकालिक बनेका छन् ।

३.
एक नेताले अर्कोलाई सराप्न थाले
फूर्ति लगाउँदै हैसियत नाप्न थाले
कस्तो यो संस्कार हाम्रा नेताहरूको
घरै जलाएर पो आगो ताप्न थाले ।

४.
युद्धको नाममा लुट चलिरहेछ
देश देश बीचमा फुट चलिरहेछ
सत्य कुरा कसले सुन्छ र खै ?
दुनियाँमा अचेल झुट चलिरहेछ ।

०००
तनहुँ, हालः टोरन्टो, क्यानडा