नेपाली हास्यव्यङ्ग्य अनलाइन पत्रिका

१. बाटो

विकास निर्माणपूर्वको बाटो हुँ म
जो जसरी हिँडे पनि खुला थिएँ
दायँवायाँ फाँट थिए, जलाशय थिए
आज ढलपानी बग्ने कुला भएँ
विकासका नाममा
घर कम्पाउन्डहरूले च्यापिँदा च्यापिँदै
आज मुसा च्यापिने दुला भएँ ।

२. खोला

बस्ती खोलामा पसेपछि
खोलो पनि बस्तीमा पस्ने रहेछ
बस्तीले खोलालाई नपत्याएपछि
खोलो पनि वस्तीलाई नपत्याउने रहेछ
म अन्योल छु खोलालाई गाली गर्ने कि बस्तीलाई
किन अल्मलिए सहसभ्यतामा हुर्किएका मान्छे र खोला
हेर्दाहेर्दै मान्छेले खोलालाई, खोलाले मान्छेलाई सक्ने रहेछ ।

३. पैह्रो

म अन्योलमा छु अचेल
विकास भएको हो कि विनास भएको हो
आफ्नै छाती दुख्न थालेको छ अचेल
डोजर गाउँमा चलेको हो कि मेरै छातीमा चलेको हो
चेतना र विकास सँगसँगै हुनुपर्थ्याे सायद
गाउँमा पहिरो गएको हो कि योजनामा पहिरो गएको हो ?

०००
काठमाडौं