नेपाली हास्यव्यङ्ग्य अनलाइन पत्रिका

भाेजराज रेग्मी  मुखाले :

१.
सुनको गङ्गामा प्रचण्ड जहाज चल्छ
लाज पचाएपछि मस्तले काज चल्छ
काग कराउँदै गरोस् न पिना सुकिरहन्छ
पिशाचहरूको आज्ञाले मुर्कुट्टाहरूको राज चल्छ।

२.
हाक्काहाक्की हसुर्नेलाई छोपछाप समिति आयो
आँखै नहेरी घिच्नेलाई उम्काउने मिति आयो
भेडाच्याङ्ग्रा चुड्की बजाओ, बाख्राजति ताली बजाओ !
लौ हेर हेर ! ब्वाँसाको दाह्रामा बुकुवा दल्ने नीति आयो ।

३.
सरकार लुकाउँछ – देखाउनै पर्ने कुरा
सुन्दरी देखाउँछ्न् – लुकाउनै पर्ने कुरा
यिनका चाला बुझ्न नसकेर बेहाल भो अरूको,
हे दैव ! बुझाइदेउन – बुझाउनै पर्ने कुरा ।

०००
पेप्सीकाेला, भक्तपुर