नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
हुतिहारा गति भ्रष्ट मति राम्रो प्रगति सङ्गति छैन
ढाँट्ने ठग्ने लुट्ने खाने बाहेकको क्यै उपती छैन
निशुल्क स्वास्थ्य सेवाको गुड्डी हाँक्छ सरकार तर
अस्पताल पुग्दा बिरामीलाई चाहिने ओखती छैन ।

२.
के के ल्याउला अब यो पहर बुझेको भए मरी जाउँ
कहाँ के गर्छ यो बैमान सहर बुझेको भए मरी जाउँ
बदलिन्छौ कहिले यो कित्तामा कहिले त्यो कित्तामा
के कस्ता छन् खै तिम्रा रहर बुझेको भए मरी जाउँ ।

३.
कहिल्यै नखुल्ने बन्द तालाको के काम छ
स्पष्ट भन्नुस् न गनगने चालाको के काम छ
न मादल न डमरू बन्छ जीवन सकिएपछि
बताउनुस् न त्यो गोरो छालाको के काम छ ।

४.
जसरी घुम्टो उघारेर पूर्णिमाको जून निस्कन्छ
अथवा धर्तीको गर्भबाट अमूल्य सुन निस्कन्छ
रेटिदा रेटिदै सारङ्गीको यस्तो तार बनेछु कि म
रेटछन् जब निर्मम यादहरू मधुर धुन निस्कन्छ ।

०००
भैरहवा