नेपाली हास्यव्यङ्ग्य अनलाइन पत्रिका

काठमाडौं, २०८० चैत २१ । भक्तपुर बुढ्यौली साहित्य समाज र अनुशीलन नेपाल भक्तपुरको संयुक्त आयोजनामा कविराज घिमिरेको अध्यक्षता तथा मुकुन्द शर्मा चालिसेको प्रमुख आतिथ्यतामा स्रष्टा दीनानाथ पोखरेलको तेस्रो कतिको रूपमा महाकाव्य कृति ‘माइपोखरी’ प्रज्ञा प्रतिष्ठानको पारिजात कक्षमा लोकार्पण भएको छ ।

कार्यक्रममा कृष्णमुरारी गौतम ‘चट्याङ मास्टर’, डा. देवी नेपाल, चन्द्रप्रसाद न्यौपाने, डा. इन्दुल केसी, राजन न्यौपाने, डा. सीता सुवेदी पन्थीको विशिष्ट आतिथ्यता रहेको थियो ।

राष्ट्रिय गान तथा शहीदहरूको सम्झनामा मौनधारण पश्चात् कार्यक्रम औपचारिकतातर्फ लम्बिएको थियो । कार्यक्रमका अतिथि तथा दर्शकहरूलाई डा सीता सुवेदी पन्थीले स्वागत मन्तव्यद्वारा स्वागत गर्नुभएको थियो ।

प्रमुख अतिथिले कार्यक्रमको ब्यानरमा हस्ताक्षर गरेर कार्यक्रमको उद्घाटन गर्नु भएको यस लोकापर्ण कार्यक्रममा लोकार्पित कृतिको बारेमा डा. देवी नेपालले अत्यन्तै ओजपूर्ण चर्चा गर्नुभएको थियो ।

यसैगरी मञ्चमा आसिन प्रमुख अतिथि, विशिष्ट अतिथिहरूले स्रष्टा दीनानाथ पोख्रेललाई कृतिगत बधाईं तथा शुभकामना मन्तव्य प्रस्तुत गर्नुभएको थियो ।

त्यसैगरी कृतिभित्रबाट फरक फरक सगएबाट पुजन मिश्र, विद्या अनामिका तिवारी, धरणी गुरागाईं, सम्पत काफ्ले, कमलराज केसी, कृष्णप्रसाद पौडेलले पाँच पाच श्लोक रचना वाचन गर्नुभएको थियो ।

स्रष्टा दीनानाथ पोख्रेलका यसअघि ‘श्रद्धाञ्जली शोकखण्डकाव्य’ र ‘मुटुभित्रको माटो’ गरी दुई छन्द कवितासङ्ग्रह प्रकाशित भइसकेका छन् ।

जीवनाथ अधिकारीद्वारा सञ्चालित आजको कार्यक्रममा अन्त्यतिर स्रष्टाले लेखकीय मन्तव्य तथा भक्तपुर बुढ्यौली समाजका अध्यक्ष कविराज घिमिरेले कार्यक्रको समापन गर्नुभएको थियो ।

०००