नेपाली हास्यव्यङ्ग्य अनलाइन पत्रिका

काठमाडाैं, २०८१ माघ २१ । नियात्रा समाज नेपालले २०८० सालको ‘पवन आलोक नियात्रा पुरस्कार’ तेजप्रकाश श्रेष्ठको नियात्राकृति ‘ग्वंगचुलीको हिउँ’लाई प्रदान गरेको छ ।

सोमबार काठमाडौंमा आयोजित कार्यक्रममा प्रमुख अतिथि साहित्यकार मञ्जुल नेपालले नगद राशि २५ हजारसहित साहित्यकार श्रेष्ठलाई पुरस्कार प्रदान गरे ।

पुरस्कार प्रदान गर्दै मञ्जुलले नियात्रा साहित्यको उन्नयनका लागि समाजले गरेको कामको प्रशंसा गरे ।

कार्यक्रममा कृतिकार श्रेष्ठले पुरस्कारले थप काम गर्न उर्जा मिलेको बताए । समाजका पूर्वअध्यक्ष प्रतीक ढकालले पुरस्कार स्थापनाको सन्दर्भ सम्झना गर्दै यसअघि नियात्राकारहरू भीष्म उप्रेती, डा. दामोदर पुडासैनी ‘किशोर’, इल्या भट्टराईका कृति पुरस्कृत भइसकेको जानकारी दिए ।

कार्यक्रममा नियात्राकारहरू उप्रेती, डा. पुडासैनी, छनोट समितिका श्रीओम श्रेष्ठ ‘रोदन’, समाजका अध्यक्ष मोहन चापागाईंले बोले ।

पुरस्कारकी संस्थापक रेखा कँडेलको लिखित मन्तव्य उद्घोषक भवानी खतिवडाले पढेर सुनाएकी थिइन् ।

०००