नेपाली हास्यव्यङ्ग्य अनलाइन पत्रिका

काठमाडौ, २०८२ जेठ ९ । चन्द्रागिरी स्थित तीनथानामा मासिक रूपमा नियमित सञ्चालन हुँदै आएको साहित्य सरोवरको ४३ औँ श्रृङ्खला मुनाल क्लवको सभाकक्षमा सम्पन्न भएको छ ।

सरोवरका अध्यक्ष गोपीचन्द्र कार्कीको अध्यक्षतामा हास्यव्यङ्ग्यकार नरनाथ लुइँटेल प्रमुख आमन्त्रित रहनु भएको कार्यक्रममा १५ जना स्रष्टाले २१ वटा विविध रचना वाचन गरेका थिए ।

गोपीचन्द्र कार्कीले सहभागीहरूलाई स्वागत अभिव्यक्त गर्दै दिवङ्गत स्रष्टाहरू गोकुल जोशी र सञ्जय थापाप्रति शब्दश्रद्धा व्यक्त गर्नु भयो । उहाँले साहित्य सरोवरको विगत गतिविधीमाथि प्रकाश पारेर आफ्‌नो रचना प्रस्तुत गरेपछि रचना वाचनको क्रम अघि बढेको थियो ।

हिराबहादुर थापाले डिबी थापालाई स्मरण गर्दै लेखिएको ‘कर्कश’ शीर्षकको कविता, जगन्नाथ तिमल्सिनाले ‘शब्दविनोद’ शीर्षकमा, तुलसीराम भण्डारीले गजल सिर्जना प्रस्तुत गरेपछि मोहनहरि आचार्यले ‘रङ्ग तरङ्ग’ शीर्षकक कविता र माधव घिमिरेको चर्चित गीत ‘आज र राती के देखेँ सपना…’ ट्रयाकमा गाउनु भयो ।

कौशल्या लुइटेल र बाल कवि दर्पण कार्कीका रचना वाचनपछि कृष्णहरि कार्कीले ‘श्रमिकलाई सलाम’ शीर्षकको कविता प्रस्तुत गर्नु भयो भने सरिता पराजुलीले गीति कविता र सिर्जना ज्ञवालीले ‘फूल तिमी’ शीर्षकको कविता वाचन गर्नु भयो ।

मोहनहरिको अर्को गीति प्रस्तुतिपछि श्री कृष्ण भारतीले ‘चोरको नाइके’ व्यङ्ग्य कविता, सीताराम नेपालले केही बाछिटा, केही हाइकु र एक लघुकथा प्रस्तुत गर्नु भयो ।

कार्यक्रमको अन्त्यमा सुदन लुइटेलको बिजुली बत्तीसम्बन्धी व्यङ्ग्यात्मक गजल, काशीराज सुवेदीले ‘सलाम ख्वामित खुब अच्छा भो’ शीर्षकको सशक्त व्यङ्ग्य कविता र अन्त्यमा हरिशरण आचार्यले संस्कृतका दुई पद्यका नेपाली पद्यानुवाद सुनाउनु भएको थियो ।

प्रमुुख आमन्त्रित नरनाथ लुइँटेलले वाचित सिर्जनामाथि समीक्षात्मक टिप्पणी गर्दै यस श्रृङ्खलामा प्रस्तुत रचनाहरू व्यङ्ग्य वाहुल्य रहेको बताउनु भयो । ‘आफ्‌ना आस्था विश्वासका शिखरहरू देशोन्नतिलाई बिर्सेर चरम स्वार्थोन्नतिर खसेपछि हामी नेपालीहरूको भाग्य र भविष्यमाथि तुषारापात हुँदै गएको देखेर कमसेकम कलमबाटै खबरदारी गर्नु कलमजीवीको दायित्व हुन आएको छ ।’ उहाँले भन्नु भयो ।

तीनथाना, ढुङ्गाअड्डा आउँदा हास्यव्यङ्ग्यका पितामह भूतको भिनाजु अर्थात वासुदेव शर्माको स्मरण भइरहने गरेको बताउँदै शर्माको ‘निम्तालुमा नाम दरिएन’ शीर्षकको कविता प्रस्तुत गरि कार्यक्रम समापन भएको घोषणा गरिएको थियो ।

०००
– गोपीचन्द्र कार्कीको सौजन्यमा