नेपाली हास्यव्यङ्ग्य अनलाइन पत्रिका

काठमाडौँ, २०८२ कार्तिक १ । साहित्यकार तथा समालोचक ठाकुर शर्मा भण्डारीको नवीनतम कविताकृति ‘नवनी’ को साहित्यकार तथा साहित्यिक पत्रकार रोचक घिमिरेको प्रमुख आतिथ्यमा सम्पन्न एक विशिष्ट समारोहमा उपस्थित सम्पूर्ण स्रष्टाहरूद्वारा एकसाथ लोकार्पण गरिएको थियो ।

काठमाडौँको धुम्बाराहीस्थित भण्डारी निवासमा पारिवारिक वातावरणमा प्राज्ञ प्राध्यापक दिनेशराज पन्तको सभापतित्वमा सम्पन्न कार्यक्रममा भण्डारी परिवारका सबै सदस्यसहित पचास जनाभन्दा बढी साहित्यकारहरूको उपस्थिति रहेको थियो ।

कार्यक्रममा प्रमुख अतिथि रोचक घिमिरेले कृतिकार शर्मालाई नेपाली साहित्यका सरल, शालीन र साधनाशील स्रष्टाका रूपमा आफूले चिनेको बताउनुभयो ।

यसैगरी कार्यक्रमका सभापति प्रा. दिनेशराज पन्तले ठाकुर शर्मा भण्डारीलाई सक्रिय स्रष्टाका रूपमा चित्रण गर्दै उहाँको सरल र शान्त व्यवहारबाट आफू प्रभावित भएको बताउनुभयो ।

यसैगरी योगगुरु तथा प्राकृतिक चिकित्सक डा. मानसाग्निले विशिष्ट अतिथिका रूपमा मन्तव्य प्रस्तुत गर्दै स्रष्टा भण्डारीको व्यवहार र सिर्जनशीलताको प्रशंसा गर्नुभयो ।

नेपाल सरकारका पूर्व सचिव तथा साहित्यकार समालोचक गोपी मैनालीले लोकार्पित कृतिका बारेमा समीक्षात्मक मन्तव्य व्यक्त गर्दै प्रस्तुत कृतिमा छन्दोबद्ध र छन्दमुक्त कविताहरू सङ्ग्रह गरिएको र ती कविताहरूमा समाज, राष्ट्र, राष्ट्रप्रेम, राष्ट्रिय अखण्डता, जीवन, मानवता, विकृतिविसङ्गति, युवाशक्ति लगायतका विविध विषयलाई अभिव्यक्त गरिएको बताउनुभयो ।

झण्डै तीन दर्जन कृतिका स्रष्टा ठाकुर शर्मा भण्डारीले नेपाली साहित्यका विशिष्ट स्रष्टा र साधकहरूलाई आफ्नै निवासमा आमन्त्रण गरेर कार्यक्रमको आयोजना गर्ने परिवारको समेत इच्छाअनुसार कार्यक्रम तय गरिएको जानकारी गराउँदै उपस्थित सबैलाई स्वागत गर्नुका साथै सबैलाई सबैसँग परिचित समेत गराउनुभयो ।

सो अवसरमा दायित्व वाङ्मय प्रतिष्ठानका उपाध्यक्ष प्रा. डा. भागवत ढकाल, कवि महेश प्रसाई, समालोचक युवराज मैनाली, साहित्यकार सूब सेन, साहित्यकार गोविन्दप्रसाद घिमिरे ‘वेदमणि’ लगायतले कृतिकार ठाकुर शर्मा भण्डारीको व्यक्तित्व र कृतित्वका बारेमा चर्चा गर्दै उहाँको सिर्जनात्मक उन्नयनका लागि शुभकामना व्यक्त गर्नुभयो ।

तिहारको पहिलो दिन आयोजना गरिएको सो कार्यक्रममा महाकवि लक्ष्मीप्रसाद देवकोटाको स्मरण गरिएको थियो । दायित्व वाङ्मय प्रतिष्ठानद्वारा प्रकाशित सो कृतिबाट एउटा कवितालाई नारायण भण्डारी (एनबी जनकपुरी) ले गाएर सुनाउनुभएको थियो ।

अन्यन्तै पारिवारिक रूपमा आयोजित सो कार्यक्रम दायित्व वाङ्मय प्रतिष्ठानका महासचिव एवम् साहित्यकार यादव भट्टराईले संयोजन र सञ्चालन गर्नुभएको थियो ।

०००
यादव भट्टराईकाे साैजन्यमा