नेपाली हास्यव्यङ्ग्य अनलाइन पत्रिका

कविराज घिमिरे :

बनी सवाल शून्यझैँ विचार उग्र पोखियो
खुलेन वृद्ध खोपडी निकास बन्द देखियो
छ मारकाट ज्यादती लुटार छन् सयौँतिर
मुना सुकेर वृक्षका बढे समग्र पत्कर ।। १

व्यथा छ खड्गमा ठुलो छ शेर झन् निमोठिने
प्रचण्ड लेप्सिँदै गयो जहाँ टका छ पाइने
झनै छ बाबुरामको कथा न धर्म थामियो
नेपालका कि भारती भनेर भन्न सक्छ को ? २

बुढा भनेर के गरौँ भएन सोच दर्बिलो
बनेन कर्म एउटा अहा बनेर गर्बिलो
न हिम्मती बने कुनै अरू नकाम छन् सब
समाजवाद उल्टियो भनेर हिँड्छ माधव ।। ३

नरेश हुन्न पूर्वको म वर्तमानको भनी
जपेर मन्त्र एउटा छ व्यस्त वृद्ध जीवनी
दिमागमा अशुद्धता भरेर जान्छझैँ भयो
निजी भलाइ निम्तिमा कुदेर शासना दियो।। ४

भएर पूर्व पञ्चमा समेत वृद्धमा हठ
अझै तलै झरी सके रहेन शेष तागत
युवा विदेशमा हुँदा गलेर देश नीदमा
बिहाल खेप्छ जिन्दगी छ वृद्ध के दिमागमा ?

०००
भक्तपुर