नेपाली हास्यव्यङ्ग्य अनलाइन पत्रिका

मोक्ष खतिवडा :

मेघले ढाक्यो आकास जम्मै बर्सियो दरर
खहरे खोल्सा उर्लियो अब लागेछ असार
सम्याए हिलो बाउसे पसी सकेछन् जोतेर
असारे भाका गाउँछन् पाका खेतमा झरेर ( १

झिम्क्याई आँखा सानीले उता लौ रोप्नै छोडेर
बाउसे हाँस्दै छ्याप्दै छ हिलो मौका हो भनेर
बुहारी आइन् के खाजा ल्याइन् डोकामा बोकेर
असारे भाका गाउँछन् पाका खेतमा झरेर ( २

त्यो सिम्ले खेत रोपेर आफैँ भकारी भर्नुछ
सपना यस्तै बुनेर जेठो खुसीले हौसिन्छ
ठेला छन् हेर्ने फुर्सद छैन मास हो असार
असारे भाका गाउँछन पाका खेतमा झरेर ( ३

प्रविधि बढ्यो न अर्मपर्म न हलो चाहिन्छ
नाचेको आफू दौंतरीसँग सम्झना ताजै छ
खाएको मिठो चाम्रेको खाजा गुन्द्रुक अचार
असारे भाका गाउँछन् पाका खेतमा झरेर ( ४

रुझ्दै छन् सानी पर्वाह हुन्न सिम्सिमे पानीको
सानी छन् मेला बालख एक्लो घरमा छोडेको
दुःखको मानो उब्जिन्छ हेर किसान भएर
असारे भाका गाउँछन् पाका खेतमा झरेर ( ५

०००
शान्तिनगर ( झापा )