नेपाली हास्यव्यङ्ग्य अनलाइन पत्रिका

इन्द्रनारायण सुवेदी :

खेतमा झरे खेतालाहरू पाखुरा सुर्किए
पसिना गाली खेतका गरा सनक्कै खुर्किए
भिझेछ माटो कान्लो र आँठो पानीले भरेर
असारे भाका गाउँछन् पाका खेतमा झरेर।१।

गराको हिलो मिहिन गिलो गालामा पोतेर
गल्दैन हली बिहानैदेखि त्यो खेत जोतेर
कान्छीले चिया हातैमा दिन्छे गिलास भरेर
असारे भाका गाउँछन् पाका खेतमा झरेर ।२।

घुमको सुर्ती झिकेर माडिन् जन्तरी आमाले
सलाई कोरी सल्काए खिली बेरेर मामाले
बिउका मुठा फ्याँक्दै छ कोही बाउसे गरेर
असारे भाका गाउँछन् पाका खेतमा झरेर ।३।

०००
झापा