नेपाली हास्यव्यङ्ग्य अनलाइन पत्रिका

सुनिता निरौला पौडेल :

“नेपाल बसेर के गर्नु ? पढाइ भएर पनि राम्रो काम पाइन्न । म त जान्छु होला विदेशतिर ।” दिक्क मान्दै साथीलाई भन्यो उसले ।

“आ…, के कुरा गर्छौ साथी, यहीँ नेपालमा बसेर राजनीति गर न । कस्तो मालामाल छ राजनीतिमा ! तिमी किन विदेश जाने सोचाइमा छौ ?” उसले चकित पार्दै साथीलाई भन्यो । तर उसले भने विदेश जाने निणर्य गर्‍यो ।

अलिक दिनपछि राम विदेश गयो । यता श्याम भने राजनीतितिर लाग्यो । हेर्दाहेर्दै मन्त्री पनि भयो, अकुत पैसा कमायो उसले । केही महिनापछि फोनबाट उनीहरूको कुराकानी भयो ।

“अरे राम, नेपाल आउन यार ! म तिमीलाई मन्त्री बनाइदिन्छु, मालामाल छ राजनीति गर्न जान्यो भने ।”

“ओहो ! हो र भन्या ? त्यसो भए त म तुरुन्तै नेपालमै आउँछु । यहाँ घडीको सुईको भरमा काम गर्नुपर्छ । त्यहाँ बरु गफ लडाएरै पनि पैसा कमाइन्छ भने आइहालेँ म नेपाल ।”

दुबैजना साथी राजनीतिमा पसेर मन्त्री भएपछि उनीहरूलाई चिठ्ठा परे जस्तो भयो । आफ्नो-आफ्नो काममा व्यस्त भए उनीहरू ।

एकदिन उनीहरूको भेटघाट भयो ।

“हो रहेछ श्याम, आज तिमीले गर्दा म करोडौं धन कमाएँ । धन्य राजनीति र मन्त्री पद । तर….।”
“के तर, स्पष्ट भन न राम ।”
गम्भीर हुँदै रामले जवाफ दिए । के यो धन सजिलै पचाउन सकिएला त श्याम ?”

०००
२०८० । ०२ । १४ गते
भक्तपुर- राधे, राधे निकोशेरा