नेपाली हास्यव्यङ्ग्य अनलाइन पत्रिका

नगिता लेप्चा राई :

हिजोआज कुकुरलाई कुकुर भन्न मिल्दैन । भुस्याहा कुकुरको कुरा छोड्दिऊँ घरमा आदरसाथ पालिने कुकुरलाई कुकुर भन्यो भनेर तपाईंको चाकडी जान सक्छ । तपाईंको नाममा थानामा नालिश दर्ता हुनसक्छ । होसियार ! हिजोआज छरछिमेकमा भीआईपीको दर्जा दिएर पालिने कुकुरलाई तपाईंंले कुकुर भनी बालाउनुभयो भने सर्वनाश ! ‘डगी’ भनेर बोलाइदिनुहोस्.. तपाईंको प्रेष्टिज कहाँ माथि पुग्छ ।

यसैले ता घरमा महङ्गो महङ्गो पालिएको कुकुरलाई माई डगी, माई स्वीट डगी भनी म्वाइँ खानेहरूको सङ्ख्या बढेको देखिन्छ । अचेलको म्वाइँ डग म्वाइँ भन्नु नै मुनासिब होला । हिजोआज आफ्नो लोग्नेलाई भन्दा बढी आफ्नो डगीलाई ध्यान दिन थालिएको देखिन्छ । यसैले डगीको निम्ति महङ्गो महङ्गो गलैँचा ल्याइएको हुन्छ । बरू लोग्ने भुइँतिर वा सोफातिर सुते चल्छ तर मेरो डगी मेरो बेडमा मैसित सुत्नुपर्छ । डगीबिना म सुत्नै सक्दिनँ भन्ने रमणीहरू पनि नदेखिएको होइन ।

डगीलाई घरमा भीआइपी ट्रिटमेण्ट हुन्छ । सबैभन्दा बरू लोग्ने अटेरी हुन्छ तर घरको डगी मालिकको आदेशबिना एक डेग हल्लिँदैन न दिएको लञ्च वा डिनर नै सेवन गर्छ ।

हाम्रो गाउँतिर पनि डगी पाल्ने फैशनै भएको छ हिजोआज । घरमा पूजा कोठा वा पूजा थान नहोस्..चल्छ तर डगी नभए जीवन नै चल्दैन भनेजस्तो छ । स्वामीभक्ति हुन्छन् यी डगी भन्ने चारखुट्टे प्राणीहरू । मालिकले दह्रोसित समातेको साङ्लोमा आफू बाँधिएर हिँड्दा डगी गाउँको बाटो, गल्छिँडासित धमासले हिँडेको देख्दा भूस्याहा कुकुरहरू वास्तै गर्दैनन् । उनीहरूता एक ठाउँमा गुजुल्टिएर जुलेबी जस्तो भई मस्त निदाउँछन् । भूस्याहाहरूलाई कसैको वास्ता छैन । सामान्य जूठो भात खाइदिएको भेटीस्वरूप दिनभरि गुजुल्टिएर रातभरि जागो बसेर गाउँमा नचिनेको कसैलाई ढिम्किन दिँदैनन् । तर यी साङ्लोमा बाँधिएर हिँड्ने डगीलाई गाउँमा हात्ती आवोस् कि चोर लुतो नकाइ केही हुँदैन । उसलाई त मालिकनीको दङ्दङ्ती गन्हाउने काखी सुँघ्दै छातीमै टाँसिएर सुत्नु पाए अरु गाउँमा जेसुकै होस्, ड्याम केयर ।

घरमा पालिने यस्ता डगीहरू अङ्गेजी बाहेक अरु भाषा बुझ्दैनन् । अङ्ग्रेजीको देशानले भेटेका हाम्रा नानीहरूलाई नेपाली भाषा शब्द उच्चारण गर्न गाह्रो परेको कुरा मैले यहाँ भनिरहन पर्दैन । त्यस्तै भीआइपी ट्रिटमेण्ट पाएका यी भीआइपी डगीलाई पनि मालिकनीले अङ्ग्रेजी शब्द सिकाएर पासपोर्ट हराएको ब्रिटिश नै बनाएको देखिन्छ । गो दियर, कम टाइगर, सिट ग्रेसी, अप स्याण्डो, स्लिप डेजी । एउटा टेनिस गोली पर तिर घुइँकाइँ दिन्छन् अनि मालिक वा मालिकनीले आदेश गर्छन्, गो…गो ब्रिङ्ग द बल ।

बस् आदेश सुन्ने बित्तिकै उ…पर… पुगेको टेनिस बल मुखमा च्यापेर मालिक मालिकनीलाई सुम्पन्छ । अन्य कसैले त्यसको मुखबाट बल खोस्ने प्रयास गरे डगीले मुखबाट बल छोडे त के ? अर्कालाई बल नदिँदा मालिक वा मालिकनी बुरुक बुरुक उफ्रन्छन् । त्यसो गरेको खण्डमा फेरि मालिकनीको पक्षबाट एक म्वाइँ च्वाक्कै !
गाउँका भूस्याहालाई गो पाङरे, कम राते, सिट राति भनेको कसैले सुनिँदैन । सोझै चिरुवा दाउरा निकालेर ताक्यो भने सब भूस्याहा टाप । कथङ्क गाउँका भूस्याहाहरूलाई गो जेरी, स्लिप टाटे कसैले भन्यो भने सोझे दारा ङिच्याएर यस्तो कुकुर तर्साउने भाषा नबोल भनेर आक्रमण गर्ने बेर लाउँदैन । तँ नेपाली गाउँमा जन्मेका होस् नेपाली भाषामै बोल्…नेपाली भाषाको अपमान नगर् भनी आँखा तर्ने भूस्याहरू पनि कम्ति छैनन् गाउँघरतिर ।

भूस्याहाहरू बिजुली चम्किँदा पनि तर्सिन्छन् । र ता भनिन्छ अगुल्टो हानेको कुकुर बिजुली चम्किँदा पनि तर्सिन्छ। जीवनमा यी भूस्याहाहरू कति चोटि अगुल्टो हनाइमा परेर कतिले ढाँढ भाँचिपठाएको छ… कतिको पूच्छर डढेर ठुटे भएको छ । तर यी भीआइपी डगीहरू बिजुली चम्किँदा पटक्कै डराउँदैनन् । उनलाई कसले अगुल्टोले हानेको होस् न बिजुली चम्किँदा तर्सिन परोस् । बरू उल्टा बिजुली चम्किँदा मालिकनीले पो डगीलाई बाहुपाशमा कसी मेरो डगीलाई डर लाग्यो (?) भनी श्वास न वास बनाउनु मात्रै होइन अरट्ठै पारेर हुरुक्कै पार्छिन् । बिजुलीको चम्काइ त होइन बरू मालिकनीको काखीको ह्वास्स् ह्वास्सै गन्धले उल्टी आउला जस्तो हुन्छ । हाम्रा नेताहरूलाई पनि अचेल अगुल्टोको झटारो हान्नु पर्दैन । नेता महोदयलाई त क्याटको क्याट नोटको बिटाले हान्नुहोस्, कमिशनको सिर्कनुले सोर्क्याउनुहोस् डगी जतिकै तपाईंलाई टेर्छ ।

तर डगीको चालामाला बेढङ्गको हुन्छ । डगीको फुर्के, अहम्, घमण्ड देख्नुभयो भने तपाईंको टाउको तातिन्छ । एकदमै पलापिएको हुन्छ । घरमा वा बाहिर लनमा चोर बदमाश आए डगी भन्ने भीआइपी जन्तुले वास्तै गर्दैन । मालिकको घर फोरियोस् कि मालिकको गाडी उडाइदेवोस् । डगीलाई वास्तै हुँदैन । उसलाई त मालिकनीको काखमा सुत्न पाए भइगयो ।

मेरो अध्ययनको आधारमा म के भन्छु भने घरमा महङ्गो न महङ्गो दामको डगी पालेर स्वाङ ढर्रा पार्नु भन्दा बरू एकजना नेता पाल्नुहोस् । बस उसलाई कमिशन, घूस, नोकरी छोकडी मात्रै दिनुहोस् भुस्याहा कुकुरले भन्दा खतरनाक पाराले घरको रखवारी गर्छ ।

नेतालाई डगी भन्दा पनि हण्ड्रेड पर्सेण्ट केयर गर्नुहोस्… सके डगीलाई जस्तै खाटमा सँगै सुताउनुहोस्… हेर्नुहोस् नेता कति वफादारी हुँदोरहेछ । कतिको मालिकनी भक्ति हुँदोरहेछ ।

मलाई भोट दिनुपर्‍यो भने घरमा डगी होइन नेतालाई डगीको दर्जा दिनुहोस् भनी भोट हाल्छु ।

०००
भारत