नेपाली हास्यव्यङ्ग्य अनलाइन पत्रिका

पिँडालु पण्डित :

क्लाउड कान्छा सिकिस्त बिरामी परेको आठ वर्ष भइसक्यो । एकान्नब्बे वर्षदेखि बिरामी परेका उनी अहिले उनान्सय वर्षका भए । गए-गए-गए भन्यो फेरि बोरिन्छन् र बाँच्छन् । फेरि गए-गए-गए भन्यो फेरि बाँच्छन् । उपचारमा संलग्न चिकित्सक र उनका आफन्त उनको यो अवस्था देखेर आजित छन् । यसो गरे पनि हुन्न, उसो गरे पनि हुन्न ।

उनी विदेशी आमा र नेपाली बाबुका जेठा छोरा । उनको यो नाम रखाइको प्रभाव उनीहरूको विवाहसँग जोडिएको छ । बाबुआमा दुवैको सल्लाह बमोजिम आमाले क्लाउड र बाबुले कान्छा प्रस्ताव गरेपछि दुवैको प्रस्तावको योगबाट उनको नाम क्लाउड कान्छा राखिएको हो ।

क्लाउड कान्छा सम्पन्न परिवारका मानिस । नपुग्दो केही छैन । अथाह सम्पत्तिका मालिक । तर पनि मुढो लडेजस्तै लड्न परेपछि सम्पत्ति धेरै भएर मात्र पनि के गर्नू ? सम्पत्ति न औषधि हो, न के ! पैसाकै सिरक, डसना, तकिया र तन्ना बनाएर ओडे ओछ्याए पनि हुने हुनामी नभई छोड्दो रहेनछ । यस्तै भइरहेछ क्लाउड कान्छाका हकमा पनि ।

चित्रगुप्त दिनको एक पटक आप्mनो ढड्डा नियाल्छन् । उनलाई मत्र्यलोकबाट उठाउने समय भइसकेको मात्र होइन, घर्किसकेको छ । यमराजलाई बिन्ती गरेर पटक-पटक यमदूतहरू पठाउँदा पनि तिनले क्लाउड कान्छालाई ल्याउन सकिरहेका छैनन् । उनको उपचारमा संलग्न चिकित्सक र आफन्तहरू मात्र नभएर त्यही एउटै व्यक्तिलाई उठाउन पटक-पटक मत्र्यलोक धाइरहनुपर्दा यमदूतहरू पनि आजित भइसकेका छन् ।

पछिल्लो समय सरकारले निवृत्तिभरण, सामाजिक सुरक्षा भत्ता, औषधोपचार सुविधालगायतका राज्यप्रदत्त सेवा प्राप्तिमा मात्र नभएर नागरिकले मृत्युवरण गर्दा पनि राष्ट्रिय परिचय-पत्र (रापप) देखाउनुपर्ने नियम ल्याएको रहेछ । तर क्लाउड कान्छाले अहिलेसम्म रापप बनाएकै रहेनछन् । मत्र्यलोकी भिसा सकिइसक्दा पनि यमदूतहरूले उनलाई उठाउन नसक्नुमा यतिखेर उनको साथमा यही रापप नहुनु नै मुख्य कारण बनेको रहेछ ।

०००
नुवाकोट, हाल काठमाडौं
२०८१/५/५