नेपाली हास्यव्यङ्ग्य अनलाइन पत्रिका

१
बजाई व्यङ्ग्यको बाजा, जगाई जागृति-ध्वनि
जल्ले चनाखो पारेथ्यो नेपाली जनजीवनी
उही ज्वलन्त मान्छेको सम्झना गरिँदा यहाँ
अग्लिने देशको सान, स्वाभिमान जहाँतहाँ ।

२
हास्यको रङ्गमा घोली व्यङ्ग्यको रस उत्तम
गरेथ्यो जसले राम्रो हाम्रो साहित्य उद्यम
तिखारी लेखनीलाई फल्दा उद्यमशीलता
पढ्ने पाठक छन् मक्ख पाई पठनशीलता ।

३
बुझी समाजको पीडा, पढी मानिसको मन
बनायो जिन्दगीलाई जसले अधुनातन
स्रष्टाको सृष्टिको स्वाद विलक्षण सुभाषित
मौलिई फैलियो व्यङ्ग्य-वाणको तीक्ष्णतासित ।

४
लक्षणा व्यञ्जनावृत्ति चलाई शब्दका फणी
हुँदा भैरव अर्याल हाम्रा व्यङ्ग्य-शिरोमणि
बाङ्गा वाक्यहरूसाथ शैली शिल्प नयाँ उनी
सिङ्गो बनाउँदा माला रमाएको छ जीवनी ।

रामहिटी, काठमाडौँ

‘आलेख’ संयुक्ताङ्क ३७ ३८