नेपाली हास्यव्यङ्ग्य अनलाइन पत्रिका

ढोँगी शासकका विरुद्ध जनता आवाज बोकी उठ
तिम्रा बन्दुक नालका अघि सरी थापेर छाती बढ ।
सक्छौ मार करोड नागरिकका ताँतीहरू निस्किए
तिम्रो लास बनाउँछौँ जमिनको माटो कतै बेचिए ।

बढ्ला भोलि अमेरिकी दबदबा छिर्लान् सिपाहीहरू
सुत्केरी कसरी सुरक्षित रहून् च्यापेर नानीहरू ?
लाखौँलाख जडीबुटी खनिजमा आँखा लगायौ किन ?
हाम्रो देश नहोस् इराक सिरिया बेचेर आफ्नोपन ।

पाए पित्तल किन्न शासकहरू बेच्छन् सुनौला सुन
झुप्राभित्र चुलो चिसो भइरह्यो किन्नै नसक्दा नुन ।
आमा बेच्न तयार छन् डलरमा बिक्नेहरू देशमा
छिः कस्तो गणतन्त्रको बिगबिगी आएछ नेपालमा ।

जो जान्छन् सरकारमा मुलुकको लुट्छन् तिनै अस्मिता
कोदाली खुकुरी खुँडा घन झिकी उत्रौँ हिरा फोरिँदा ।
पुर्खाको बलिदान बिर्सिन पुगी को सक्छ लाछी हुन
लिन्छौ जीवन एकको यदि भने सक्छन् सयौँ जन्मिन ।

सुस्तामा लिपुलेकमा छिचिमिरा गोहीहरू पस्तछन्
हामी मौन बस्यौँ भने बल गरी नेपाल नै निल्दछन् ।
गिद्देदृष्टि पर्यो सधैँ असुरको नेपालका बुद्धमा
वैरीका तरबार धार छिचली हामी लडौँ युद्धमा ।

काठमाडौं