रुद्र ज्ञवालीकिस्सा सुनाउँदै
भट्टीको मालिकले ज्ञानगुनका किस्सा सुनाउँदैछ
भिक्षुले एकान्तमा खुनका किस्सा सुनाउँदैछ
खै किन बतुराएको होला पुरेत बुढो पनि
बिहेको मण्डपमा अपसकुनको किस्सा सुनाउँदैछ
देख्नु भो रमिता नयाँ प्रेमीले प्रेमिकालाई
बोलाएर अँध्यारोमा जूनका किस्सा सुनाउँदैछ
महायज्ञमा भीड तान्न युवा पण्डित अचेल
भागवतका नाममा मैथुनका किस्सा सुनाउँदैछ
प्रवचन सुन्नु भयो कि त्यो नयाँ फकिरको
किरिया बसेकालाई नुनका किस्सा सुनाउँदैछ
ठट्टा होे यदि भने त्यसको पनि त हद हुन्छ
टुँडिखेलमा नेताले कार्टुनका किस्सा सुनाउँदैछ
हाँसेरै मरिन्छ क्यार मुस्कान पाशा, यो सर्कार त
संविधानका कुरा छोडी हनिमुनका किस्सा सुनाउँदैछ ।
गुल्मी
