नेपाली हास्यव्यङ्ग्य अनलाइन पत्रिका

अघाएकाहरू आए
भोकाएकाहरू आए
आन्दोलनकारीहरू आए
गुप्तचरहरू आए
चाइना नाकाका प्याज व्यापारी आए
पुजारी आए
ज्योतिष आए
वकिल आए
भरिए प्लास्टिकका कुर्सीहरू
गुम्बानेरको चिया पसल
बन्यो बुलन्द अखडा
भर्खरै तीज गीतमा खेलेको मोडेलले
चिनायो आफूलाई नव कलाकारको पदवीसहित
माछापोखरीबाट चियाको तलतल मेटाउन
आए इतर जिल्लाबासी उद्योगी मित्र
राजनीतिकबाट थाकेका राजन दाइ
तारकेश्वरधाममा सप्ताह लगाइरहे
रक्सीबाट थाकेका ओरिल दाइले
पुराना कहानी सुनाइरहे
पत्रकार गोर्कण बरालहरू
चिया झैँ ताता बहस छेडिरहे
बुलन्द बन्यो वैरागी समय
आगो , आन्दोलन , कविताहरू
जग्गा , सेयर बजार र प्रचण्डपथका थोत्रा ट्याक्सीहरू
बयल गाडा , रोटेसन अफ नेपाल बन्द अनि सामाजिक संजालको धमकाहरू
कमरेड आहुतीको अर्राष्ट्रिय अन्तरबार्ता
र संसदलाई नै हलाउन सफल मकै पोल्ने दिदिको अनुहार
चियाका गीलासमा उभिन तयार छ्न यतिखेर
देशको सिङ्गो तस्वीर
एउटा मानिस केका लागी बाँच्छ
रुसी साहित्यको पाठक अलमल छ
संशोधनवादवाद तुवाँलो लागेपछि
अक्टोबर रिभुलेसन भुल्न थालेका छ्न मानिसहरू
चेखवका कथा र अजम्बरी गाउँ
झोलामा भेटिनुपर्ने समय
लालपुर्जा झोलामा हालेर कस्तो क्रान्ति गर्छौ कमरेड ?
बालुवाटार बालुवा जस्तो खस्रो चेहरा बिक्री गरेर
कसरी जन्मिन्छ्न लेनिनहरू
बुर्जुवाहरू स्कुटी चढेर सिंहदरबार लागेपनि
कसरी फेरिन सक्छ जनताको बलिदान गर्ने चाह
कहिलेकाही यस्तै भावुक बहस गर्छ
कोही
लाग्छ भोको ज्वाला निभाउने उद्यमतिर
कुनै उराठ दिन
हामी पिरहेछौ
बिष्णुमति किनारमा एक कप चिया ।