नेपाली हास्यव्यङ्ग्य अनलाइन पत्रिका

मुसा सधैँ हामीलाई भुमिगत बसेर पिरोल्ने जन्तु भए पनि यसले हामीलाई होशियार बस्न संकेत गर्छ । मुसाको आन्दोलन चलिरहँदा हामी सधैँ चनाखो हुने हो भने र यसका सन्तानका विरुद्धमा अभियान चलाउने हो भने मुसाको सम्मेलन तुहिन सक्छ । सवार्थले भरिएको मुसाको आन्दोलन र सम्मेलनले हामी घरदेखि वनसम्म आजित भएका छौँ । उदरानन्द भुँडे गणेशजीको निर्देशनकै कारण मुसाले आफ्नो गतिविधिलाई यसरी राष्ट्रिय अन्तराष्ट्रियस्तरसम्म आफ्नो हैकम जमाउन सफल भएको हुनु पर्छ ।

गृहिणी भित्र्याउन र सन्तानोत्पादन गर्न विश्वमै नाम कहलिएको मुसाले हामी नेपालीका बिचमा उहिलेका वामपन्थी जन्तु भनेर चिनिएको छ । अहिले त वामपन्थीहरू सार्वजनिक भएर बसेका छन् । तर केही भने आफूलाई सार्वजनिक रूपमै अर्ध भूमिगत भएको घोषणा गर्न लाज मान्दैनन् । त्यस्तै अर्ध भूमिगत जस्तो लाग्ने मुसाले हामीले लुकाएर राखेको सम्पतिदेखि भान्सासम्म पुगेर उपद्रो गर्न सक्ने हैसियत राख्दछ । हाम्रो भण्डारभित्र नपस्ने हो भने गणेशजकिो उदरभित्र नै मुसा दौडन थाल्छ । गणेशजीको अङ्गरक्षकका रूपमा चिनिएको मुसाको आन्दोलन यतिबेला आफ्नो व्यक्तिगत स्वार्थमा चुलिएको स्पष्ट छ ।

मुसा कोही महाराजा भएका छन् । कोही राजा त कोही मन्त्री तन्त्री खन्त्री समेत भएका छन. । मुसाका नेता कार्यकर्ता भूमिगत भएर आफ्ना महाराजा राजाहरू पाल्न लागि परेका छन् । देशको जुनसुकै भागमा पनि प्वाल पारेर लुटी खान, चोरी खान पल्केका मुसाहरू यो वषाृको समयमा बढी चलमलाउछन । मंसिर पुषको समयमा घर, गोठ, धान खेततिर बढी रमाउँछन । वर्षाका समयमा धान खेततिर पानी हुने भएकोले सुख्खा ठाउँ कता छ त्यतैतिर मल्खु खान र मल्खु कसरी तयार हुन्छ त्यसको उपाय खाजीमा लागेका हुन्छन । हिउँदका समयमा मुसाहरू जहाँ जहाँ गयो त्यही त्यही विहे गरेर सन्तान उत्पादनमा अत्यन्त लगनशील भएर लाग्छन् । भनौ यो मुसाहरूको मौसमी आन्दोलन हो भन्दा फरक पर्दैन ।

भान्सामा बिरालोको उपस्थिति छैन भने मुसाको रजाइँले सिमा नाघेर महाभारतको युद्ध झैँ हुन्छ । बिरालोलाई भान्सामा दूध चाहिन्छ । दूध छ भने मुसा मार्न बिर्सने बिरालोले समाजलाई आफ्नो कब्जामा लिएर मुसालाई छाडा राखेका कारण मुसाले आन्दोलन गर्ने मोका पाएको हो । मुसाहरूले पहिले पहिले गरेको भूमिगत आन्दोलनको रहस्य यतिबेला आएर स्पष्ट भएको छ । भनौँ मुसाहरू स्वार्थमा लिप्सिएर पद प्रतिष्ठाकालागि आन्दोलित भएका रहेछन् भन्ने कुरा सबैले बुझ्ने अवसर पाएका छन् । भनौँ नेपालमा आन्दोलित मुसाहरू मिठो मसिनो खानकालागि मरिहत्ते गरिरहेका छन् । कतिपय मुसा मिठो मसिनो पाएपछि चुप लागेका छन् ।

हिड्ने बाटो फरक फरक भएका यि मुसाहरूको आर्थिक क्रान्तिको पाटो पनि परक छ । भूमिगत रूपमै आर्थिक, कृषि, सामाजिक, राजनीतिक, साँस्कृतिक क्रान्ति गर्न सफल मुसाहरू भुसमा आगो लगाएर बोराभित्र लुक्छन् । हिजो त्यसै गरेको थिए मुसाहरूले समाजमा । अरुभन्दा पनि यि मुसाहरू अहिले भूमिगत रूपमा आर्थिक उपार्जनमा निकै अगाडि रहेका छन् । पहिलेको भूमिगत अवस्थामा पनि आर्थिक पाटोमा बाटो घाटो नै उनीहरूकै थियो । अहिले देखागत रूपमा नै आर्थिक पाटोलाई जीविकोपार्जनको बाटो बनाएका छन् ।

प्रधानमन्त्रीको कार्यालयदेखि प्रदेश हुँदै स्थानीयस्तरको पालिकासम्म मुसाहरूको योगदानले आर्थिक संकट निम्तिने संकेत देखापरेको कुरा भित्रैदेखि देखिने गरी पारदर्शी भएर बाहिर निस्किएकै हो । यि मुसाहरूले भित्रभित्रै कागज काटेर रुपैयाँमा परिणत गरेको कुरा आन्दोलनका क्रममा हाम्रो कानसम्म नपुगेको होइन ।

सत्य र तथ्य कुरा गर्ने हो भने हामी मुुसाको साम्राज्यमा पिल्सिएकाछौँ । अस्ती हिजो र आज पनि मुसाकै दलबलभित्र चोवलिएर आर्थिक उन्नति गर्न सकिरहेका छैनौँ । बलतलले अलिअलि जम्मा गर्‍यो मुसाले लगिहाल्छ ।

निर्वाचनपछि भूमिगत भैरहने यि मुसाहरूले आफ्ना सन्तान दरसन्तानकालगि जम्मा गर्ने नाममा कहाँ कहाँ लगेर राखे त्यसको अत्तो पत्तो नै छैन् । खोजी गर्ने निकाय नै मुसाको गोजीभित्र पसेर बसेपछि त्यहाँ सदाचारको अचारले बिचार गरिरहेको हुन्छ । मुसाको अत्याचार सदाचारमा परिणत भैरहेको समयमा हामीले उसको बिरोध गर्नु नैतिकहीन कुरा हुने हुँदा अबदेखि भ्रष्टाचार नै समाप्त हुने छ भन्नु चाहिँ बिसै आना ताना बाना हो भन्न सकिन्छ ।

इमानी मुसाहरूको भिडमा हामी बसेका छौ । हाम्रो माग प्रति मुसाहरूको अत्याचारी योगदानले अर्थतन्त्रमा भएको परिवर्तनका कारण हामी नाङ्गो हुँदै गएको सत्य तथ्य सर्वत्र चासोको विषय बनेको छ । यस्ता इमानी मुसाहरूको संगतले यो देशका जनता, रैती, नेता, कार्यकर्ता सबै सम्पति बिहीन महाधनीका रूपमा गनिन थालेको कुरा पनि म यहाँ भन्न र लेख्न छुटाउदिन ।

बिचरा मुसाहरू बिरामी हुँदा भूमिगत भएरै मुसे सरकारबाट उपचार खर्चको जोहो ओहो भन्दै गर्छन र गोजी र झोली भर्दै भोलि भेटौला अरु मुसाको पेट रेटौला भन्छन । ढाडे बिरालो दूध भातको खोजीमा ठूला मुसाको गोजीमा पसेपछि साना मुसाले पनि त जीविकोपार्जनका लागि केही न केही त गर्नु पर्‍यो । नक्कली बिरामी भएर पनि यि मुसाहरूले आर्थिक क्रान्तिमा ठूलो योगदान गरेको कुरामा म चाहिँ असहमतीका अल्छे कुरा गर्न जागरिला मुसाका अघि जान्दिन । यो देश नै सदियौँदेखि मुसाले चलाएका कारण देश सधैँ चलायमान भैरहोस् । मुसाका बथान थपिदै जाउन । जय मुसा राज्य । जय मुसा अभियान । जय मुसाको आन्दोलन ।

उदयपुर