सही नीतिको सङ्कट
दौरा फेरे जस्तो गरी नीति फेर्न थाले काले-काले मिलीजुली खान थाले भाले । छिनछिनै छेपाराले रङ फेरेसरि सङ्घीयता नीति त्यस्तै बन्छ घरी-घरी ।
कता लाग्यो गतिमति, कता भाग्यो नीति ?
सहमति नभएर अति भयो खति ।
बाटो सोझो फराकिलो बनेको नि छैन
रात बन्यो धरापिलो, शान्ति पनि छैन ।
पौरखीका पाखुरा खै ? विश्वासको पाटो
उन्नतिको संस्कृति खै ? विकासको बाटो ।
चिराचिरा भयो माटो भासिएर गयो
मन्तव्य र गन्तव्य झन् भारी भिन्न भयो ।
विकासमा प्रतिबद्ध नेता छैनन् कुनै
मिसावटी गोटी चाल्न लम्पट छन् उनै ।
शङ्का लाग्न थालेको छ मन्तव्यका प्रति
आशङ्का झन् बढेको छ गन्तव्यका प्रति ।
किचिएर जनइच्छा चाउरिएर गए
मिचिएर मन-मुटु ममचाझैँ भए ।
औँला कुनै एकै छैनन् लामा-छोटा तर
खाने बेला सबै औँला हुन्छन् बराबर ।
दौरा फेरे जस्तो गरी नीति फेर्न थाले
काले-काले मिलीजुली खान थाले भाले ।
छिनछिनै छेपाराले रङ फेरेसरि
सङ्घीयता नीति त्यस्तै बन्छ घरी-घरी ।
०००
नागार्जुन-१, रानीवन, काठमाडौं
९८४१४९१०८१