नेपाली हास्यव्यङ्ग्य अनलाइन पत्रिका

रीतिथिति थियो पैले मान्छे मन्त्री हुने यहाँ
सकिए योग्यता भा’का मन्त्री हुनेहरू यहाँ ॥
समय उल्टियो आज कताबाट कता सर्‍यो
मन्त्री हुने नयाँ पालो कृषि उपजमा पर्‍यो ॥१॥

माननीय सबै आलु पिँडालु लोकले भन्यो
अहोभाग्य यी जाबाको पुर्पुरो गतिलो बन्यो ॥
गिट्ठा आलु पिँडालु र कन्द भ्याकुरका दिन
अगाडि कसरी आयो हटेर सब दुर्दिन ॥२॥

देशको राजनीतिमा नौलोपन भयो खडा
विश्वमा उपमा बन्दै बोके साइतको घडा ॥
लत्याए अघिको सत्ता मान्छे र तिनका कुरा
देखियो सबको चाल मौकामा सुन्दरी सुरा ॥३॥

पिँडालु हौसियो यस्तो नौलो औसर पाउँदा
अगाडि उफ्रियो नाच्यो मनमा खुसी छाउँदा ॥
अटायो राज्यमन्त्रीमा त्यो पिँडालु जसैतसै
थाल्यो गाउन आफैँको स्वबखान त्यसैत्यसै ॥४॥

श्री आलु देशको मन्त्री पिँडालु राज्यमन्त्री म
अब मन्त्री सहायक गिट्ठा भ्याकुर खोज्छु म ॥
म छैन धनको लोभी खातैखात छ खल्तीमा
कर्कलो अर्दली मेरो सधैँ खडा छ ड्युटीमा ॥५॥

आदेश मुखले दिन्छु कलम चोप्दिन कतै
बल्छीमा पर्छ कि माछो ढुकेर हेर्दछु जतै ॥
सेवा हो मुखको भाव मेवा हो पेटको जडी
बकुल्लो तपसी हुँ म योभन्दा नभनौँ बढी ॥६॥

कुर्सी अङ्कल हुन् मेरा भिनाजु हाजिरी कपी
ठेकेदार सबै मेरा को छैनन् र ! अघिपछि ॥
गुरु गणेश छन् पक्का मुसाका शिष्य सक्कली
उनैको अनुयायी भै घुम्दछु धूपबत्ती लि ॥७॥

विकास बोलीमा गर्छु कार्यकर्ता रिझाउँछु
सोझो छु खल्तीमा छैन भन्दै हल्ला फिजाउँछु ॥
के गर्नु देशले दिन्न अप्ठ्यारो बस्तीमा पर्‍यो
घुँडामा आँसु झर्दैछ भन्दै हँस्सीमजा गर्‍यो ॥८॥

के गर्छन् अरूले हेर्छु नयाँ ट्याक्टिस फाल्छु म
अल्झिन्छन् लोभीका घण्ट काखमा राखी गाल्छु म ॥
नपुगे गेमको धोको फ्याट्टै कट्फर गर्छु म
चानचुने म कहाँ छु र ! पिँडालु राज्यमन्त्री म ॥९॥

सोझा’थे जनता पैला भाँडे साँढेहरू पसी
अब त भोट आउन्न ढुक्कले घरमा बसी ॥
प्रश्न हुन्न थियो पैले जे गर्दा पनि मै अघि
चम्कन्थेँ चैतको घाम जस्तै गरी सधैँभरि ॥१०॥

परिस्थिति अलि बिग्र्‍यो कपटी जालझेलले
ढल्दै गयो सबै किल्ला घटिया तालमेलले ॥
कार्यकर्ता थिए थुपै्र बिस्तारै टाढिँदै गए
सपना अरू पार्टीका बोकेर भाँडिदै गए ॥११॥

अडान नहुँदा केही हल्का कागजझैँ भएँ
रद्दीको टोकरी मात्रै घडेरी पाउने भएँ ॥
तैपनि गल्दिन साथी नेता सामान्य हैन म
पूरा मन्त्री नहुँदा नि पिँडालु राज्यमन्त्री म ॥१२॥

खैलाबैला कसो गर्दा सत्ताको स्वाद झर्दछ
जानेको छु त्यसै गर्न मौका पाउनु पर्दछ ॥
धेरैको मनको मुद्दा बोकेको वारिसे हुँ म
गुजे्र तारिख गुज्रिन्छ पिँडालु राज्यमन्त्री म ॥१३॥

लुकेको जनजिभ्रोमा पिँडालुप्रतिको छवि
सुधारूँ कसरी भन्छु थपिँदैछन् अझै कति ॥
कस्तो साइतमा मेरो परेछ जन्मकुण्डली
भावीले किन कोरेन चिट्ठै चिट्ठा ढलीमली ॥१४॥

बुझ्दैनन् कि कसो के हो पिँडालु मात्रमा किन
सबैको रोष उर्लिन्छ जसो गर्दा पनि किन ? ॥
बल्लतल्ल मिलेको यो नयाँ औसरमा पनि
खुट्टा तान्नेहरू बाक्लै देख्दैछु म अझै पनि ॥१५॥

कहिले बारीका डिल कहिले झाडीमा पनि
कर्कलोको लिई साथ सिस्नुका घारीमा पनि ॥
बास हुँदा अघि मेरो सम्पर्क जोसँग भयो
सिस्नोले पोलिँदा तिन्को मनमा कटुता रह्यो ॥१६॥

तिनैले कोक्कियो भन्छन् म भन्छु स्वादिलो छु म
काममा सब त्यस्तै हुन् बोलीमा आँटिलो छु म ॥
जति छन् तालमा डुङ्गा सबैमा टेक्दछु म त
तिवारी ताकमा हुन्छु गोतामे स्थायी हुँ म त ॥१७॥

नचिने बस्तीले अङै नौलो जाल जुटाउँछु
फुट्नमा बाँकी क्वै पाए खोजी खोजी फुटाउँछु ॥
राम्रो पो छैन त सिप नराम्रा कति छन् कति
पिँडालु राज्यमन्त्री हुँ न भूतो न भविष्यति ॥१८॥

०००
काठमाडौं