नेपाली हास्यव्यङ्ग्य अनलाइन पत्रिका

१
नभभरि ग्रह तारा चढ्नुपर्नेछ हामी
भ्रमण जगत सारा गर्नुपर्नेछ हामी
जल थल सब डुल्दै खोज्न सामान्य ज्ञान
दृढ मुटु छ सहारा बढ्नुपर्नेछ हामी ।

२.
चम चम चम गर्ने कार चाली गुडौँला
जलमनि पनडुब्बी नै पसाली बुडौँला
अरुसरि अब हामी बेस विज्ञान द्वारा
असल उडन-झूला पङ्ख हाली उडौँला ।

३.
नियति नियम त्याग्ने ठाम नै छैन भाग्ने
अरुसित कर थाप्ने काम नै छैन माग्ने
मिहिनत पसिनाले बुद्धिले बन्छ काम
परमुख कति ताक्ने नाम नै छैन जाग्ने ?

४.
अखिल जगत जित्ने वीरता हामीमा छ
प्रलय सहन सक्ने धीरता हामीमा छ
तर पनि त सुतेको सिंह बेकार हुन्छ
स्वजन अझ नउठ्दा पीर ता हामीमा छ ।

५.
जगत विकट बन्दै गा’छ रोजै महङ्गो
अलिकति धनले ता लाग्न सक्तैन टुङ्गो
अधिक धन हुनाले दुर्दशा हुन्छ भन्ने
भ्रमित मन हुनाले बन्छ मान्छे लफङ्गो ।

६.
हरि पनि भज भाइ ! नाच गाऊ रमाऊ
घुम फिर खुब मीठो खाऊ राम्रो लगाऊ
घर परिजन तिम्रा छन् त वैराग्य कस्तो ?
जगत जटिल बन्दै गा’छ पैसा कमाऊ ।

७.
नव नव सिक भाषा जान विज्ञान खासा
नव पिँढि तिमिमा नै जातिले राख्छ आशा
कति छ कति छ गर्नै राष्ट्रका लागि काम
अघि बढ दृढताका साथ त्यागी निराशा ।

०००
याङ्गुन, म्यानमार