चिप्लेकिराहरू !
चिप्लेकिराहरू ! ओकल्दै छन् चिप्ला चिप्ला जहरजस्ता आश्वासनहरू बाँड्दैछन् लालच स्वार्थ कत्ति पनि घिन नमानी यत्रतत्र चिप्लँदै यी चिप्लेकिराहरू !!
सुधा बाँस्कोटा ढकाल
जतासुकै
सलबलाइरहेका
दिनरात
बिहानसाँझ
हरपल
र्याल चुहाएर
घस्रँदै मुन्टँदै
सिङ् हल्लाएर
चिप्लिरहन्छन्
चिप्ले किराहरू !
खेतबारीमा
आँगनपेटीमा
गाउँमा
शहरमा
कार्यालयमा
सडकमा
संसदमा
जताततै
संस्थालाई
चिप्ल्याउँदै छन्
कार्यस्थललाई
धमिल्याउँदै छन्
राष्ट्रलाई
खोक्रो बनाउँदै छन्
निर्लज्ज चिप्लेकिराहरू !
संसदमा
रसिलो चिप्लोको
डङ्गुरमा
लडिबुडी गर्न पल्केका
स्वार्थलाई
मूल सिद्धान्त मानेर
निर्लिप्त
स्वार्थमा डुबेर
सेता सिङ् उचाल्दै
र्याल काढेर हिँडिरहेछन्
निष्ठाविहीन
चिप्लेकिराहरू !
घर
गाउँ
शहर
समाज हुँदै
राष्ट्रभरि
सलहको बथानझैँ
सल्केका छन्
नकच्चरा
विषालु
निर्लज्ज
चिप्लेकिराहरू !
ओकल्दै छन्
चिप्ला चिप्ला
जहरजस्ता
आश्वासनहरू बाँड्दैछन्
लालच
स्वार्थ
कत्ति पनि
घिन नमानी
यत्रतत्र
चिप्लँदै
यी चिप्लेकिराहरू !!
०००
काठमाडौँ